Gipuzkoako eta Euskadiko Txapeldun izendatu da Hondarribia zortzikoan
Mutrikun egin den trainerilla estropadan Hondarribiarrak bigarrenak izan dira. Getariaren atzetik.
Maiatzaren lehenak arraun hitzordu bi jaso ditu. Biak ala biak goizean izan dira. Batetik, aulki mugikorreko Gipuzkoako eta Euskadiko txapelketak jokatu dira Leguton (Araba). Gipuzkoako Txapelketak, berez, joan den astean behar zuen izan, apirilaren 27an, baina eguraldi txarragatik bertan behera geratu zen. Haatik, lehia bakarrean jokatu dira bi txapelak. Hondarribiarrak izan dira nagusi 6:10:80ko denborarekin. 11 segundora geratu dira Orio A ontzikoak. Hirugarren Zarautz izan da 23 segundora. Hondarribiko eskifaia Mattin Colasek, Iker Huartek, Xabier Salaberriak, Xabier Olaskoagak, Aimar Kanpandegik, Beñat Egiazuk, Ander Legazkuek, Ibai Camarerok eta Iker de la Lindek osatu dute.
8+ ontzia gaur Legutianoko uretan.
Bestetik, Mutrikuko uretan gauzatu da Gipuzkoako Trainerilla ligako lehen jardunaldia. Gizonezko seniorrak izan dira klubeko ordezkari bakarrak. Lehia estu-estua izan da getariarren eta hondarribiarren artean. Lehen ziabogan lau segundo aurretik ziren hondarribiarrak. Bigarrenean, ordea, bi segundo aurretik jarri zaizkie getariarrak. Azken luzean biak parekatu eta elkarrekin sartu dira helmugara. Foto finishak ondoren argitu duenez, ontzi marroiak irabazi du jardunaldia. Berdeak bigarren izan dira 7 zentesimetara. Hirugarren izan da Donostiarra, irabazlearengatik bi segundora.
