Zaisa Txingudik ez du denboraldiko helburua bete
Igoera play-offei agur esan behar izan diete bidasoarrek. Aldiz, 18 urtez azpikoek garaipena ospatu zuten Durangon.
Igoera play-offean amesteari utzi dio Zaisa Txingudik. Gaztedi B aurkari indartsuegia izan da haientzat, hasieratik bukaerara, Bi taldeek entsegua lortzeko aparteko lana egin zuten eta baloiaren jabetzak batetik bestera etengabe aldatu zuten. Tamalez, etxekoak ziren defentsa lanetan metroak galtzen zituztenak eta, horrela, hogeigarren minututik aurrera, bisitarien entseguak iristen joan ziren.
20 eta 25. minutuetan, Gaztedik bi entsegu lortu zituen markagailuan 3 eta 10ekoa irudikatzeko. Txingudi behin eta berriz saiatzen zen, baina ez zuen jokaldiak amaitzea lortu. 30. minutuan, entsegu eremutik gertu zeudela, gasteiztarrek baloia lapurtu zieten eta aldea handitzea lortu zuten kontraerasoaren ondoren (3-17) eta, lehenengo zatia amaitzeko, laugarren marka iritsi zen (3-22).
Atsedenaldiaren ondoren, Camareroren jokalariak indarrez sartu ziren eta aldea murriztea lortu zuten hasi eta bost minutuetara Roman Solisek lortutako entsegua eta Alejandro Lasaren eraldaketarekin (10-22).
Jokoa oso parekatua izaten jarraitu zuen eta Gaztedik oraindik bazuen zer esan. Horrela, 55. minutuan beraien azkeneko entsegua gauzatzea lortu zuten, emaitza 10 eta 29an jarriz. Hala ere, etxekoek ez zuten amore emango eta, bost minutu geroago, Lasak bere entsegua lortuko zuen, Adur Manterolak eraldatu zuena (17-29). Azkenengo minutuetan lehiak maila berean jarraitu zuen, baina ez zuten puntu gehiagorik lortu
Emaitza honekin eta La Unica Bk Zarautzen eta Uni Bilbo Ck Urgozoren aurka lortutako garaipenekin, Zaisa Txingudik laugarren postuan amaitu du liga 33 punturekin, liga Uni Bilbo Ck irabazi du, 57rekin, baina ezin izango da mailaz igo Uni Bilbo B Euskal lehenengo mailan baitago.
Datorren urtean maila horretan ibiliko dena Zornotzako Urgozo izango da, bigarren sailkatua 54 punturekin, eta La Unica B izango da, hirugarrenak 38 punturekin, Atletico San Sebastianen aurka igoera play-offa jokatuko duena. Txingudiren atzetik Gaztedi B, Zarautz B/Beltzak, Arratiko Zekorrak eta Bera Bera B sailkatu dira.
18 urtez azpikoak, irabazle Durangon
Bera Bera-Txingudi 18 urtez azpikoen taldeak modu ezin hobean bukatu du denboraldia. Durangori irabazi diote 15 eta 89ko emaitzarekin markagailuan. Gabiria Txingudi/Baztan 16 urtez azpikoak, aldiz, partida oso berdindua izan zuen Plaiaundin La Unicaren aurka. Bigarren zatian berdinketa haustea lortu zuten, baina, azkeneko 10 minutuetan, iruindarrek markagailua irauli zuten 15 eta 22koa lortzeko.
