Iker Tafall Euskadiko txapeldun izendatu da asteburuan
Eibarren jokatu zen Adinetako Euskadiko Xake Txapelketan eskuratu zuen titulua irundarrak. Marlaxka Xake Klubak beste hiru ordezkari izan zituen. German Herrerak eta Josu Tornayk, bestetik, Euskadiko Txapelketa Absolutuan parte hartu dute.
Iker Tafall saria jasotzen. Asteburu honetan Euskadiko txapeldun titulua izan da jokoan, kadete, jubenil, promesa eta absolutu mailan. Hilaren 3tik 6ra Adinetako Euskadiko Xake Txakelketan parte hartu zuten Jurgi Diazek (jubenil), Iker Tafallek (kadete), Jon Díazek (promesa) eta Gorka Tafallek (promesa), nor bere kategorian. Aritz Tornayk, 2023an kadeteetan txapeldun izan zenak, gaixo zegoelako ezin izan zuen parte hartu. Euskadiko Txapelketa Absolutuan, berriz, German Herrera eta Josu Tornay izan ziren klubeko ordezkariak.
Marlaxka Xake Klubetik beren poztasuna adierazi dute asteburuan jokalariek izandako errendimendu eta, batez ere, espirituagatik. “Oso pozik gaude gure jokalariek lehiaketa guztietan erakusten duten Marlaxkako izpirituarekin. Irabazten dutenean inspiratzaileak dira, baina gauzak espero bezala ateratzen ez direnean, are harroago jartzen gaituzte euren jarrerarekin”.
Eibarren jokatu zen txapelketako kadete mailan Iker Tafall Euskadiko txapeldun izendatu zen asteburuan lehia bikaina burutuz. Garaipena eskuratu zuen gipuzkoar bakarra izan zen. Promesa mailan, berriz, jokalariak ondo aritu ziren arren ezin izan zituzten joan den urtean lortutako emaitzak errepikatu. Iaz Gorka Tafall txapeldun ordea izan zen eta Jon Díaz bosgarren sailkatu zen. Aurten, Tafallek 9. postuan amaitu zuen txapelketa, eta Díazek 11. Jubenil mailan laugarren sailkatu zen Jurgi Diaz, iazko emaitza postu batengatik hobetuz.
Amaitzeko, Legazpin jokatu zen Euskadiko Txapelketa Absolutua “segur aski historiako Absolutuen Euskadiko Txapelketa indartsuena” izan zela kontatu dute Marlaxkako kideek. Bi taldekideek, German Herrerak eta Josu Tornayk, txapelketa “oso ona” egin zuten.21. eta 15. sailkatu ziren hurrenez hurren.
Hona hemen Marlaxkako kideek bidalitako zenbait argazki.
