Aldaketekin dator aurtengo Behobia-Donostia lasterketa
3/5 lasterketa egin dituztenek izena eman dezakete jada. Izen emate orokorra maiatzaren 7an zabalduko da.
Urteroko atletismo zita garrantzitsuenetako bat izaten da Behobia-Donostia lasterketa. Euskal Herri osoko milaka parte hartzaileez gain asko dira Kataluniatik, Madrildik edo Galiziatik, besteak beste, bertaratzen direnak. Izen ematea atzo zabaldu zuten. Egunotan 3/5 lasterketa egin dituztenek eman dezakete izena. Izen emate orokorra, berriz, maiatzaren 7an zabalduko da.
Izen emateak zabaldu berri lasterketaren nondik norakoak eman dituzte antolatzaileek. Aurtengo edizioak zenbait berritasun izango dituela jakinarazi dute. 3.000 korrikalari gutxiago izango ditu lasterketak, hau da, 27.000 parte hartzailera mugatuko da, ibilbideak 220 metro gehiago izango ditu eta irteera hamabost minutu aurreratuko dute.
Aldaketa horiek ez dira ausazkoak izan. Batetik, parte hartzaile kopurua mugatzeak lotura zuzena du tren zerbitzuekin. Lasterkari asko eta asko tren azpiegitura bidez heltzen dira irteera gunera, eta zerbitzu hori emateko errefortzuak eskaintzen dituzte. Aurten, ordea, ez dago errefortzu hori handitzeko modurik. Izan ere, Donostiatik Irunera egiten ari diren abiadura handiko trenaren Loiola eta Kaputxinoak tuneletako lanek Renferen zerbitzua murriztu egingo dute. Eta aldi berean, abiadura handiko trena Iruneraino heltzeko lanek ibilbidea aldatzea eragin dute. Irungo Katea auzoan, Elizatxo Hiribidean zehazki, dagoen zubia eraitsi egingo dute. Horregatik, lasterketa Letxunborro hiribidetik 220 metro inguru desbideratuko dute. 2014tik lasterketak 20 kilometroko ibilbidea zuen, aurten, beraz, 20 kilometro eta 220 metro izango ditu.
Lehen parte hartzaileak 09:15ean irtengo dira Behobiatik, gurpildun aulki eta handbike-ak. Patinatzaileen txanda 09:20ean hasiko da eta 09:40ean irtengo dira lehen korrikalariak.
