Auzotik auzora, II. Korrika Eguna Larreaundin
Otsailaren 24rako egun osoko egitaraua antolatu dute Larreaundi-Olaberriko auzo elkartearekin batera. Euskararekin duten konpromisoa berretsi dute.
Geldiezinik dabiltza irundarrak Korrikaren bueltan eta ttipi-ttapa II. Korrika Eguna iristear dago. Larreaundin izango da otsailaren 24an, Miguel eta Roberto auzogileak plazatxoan. Eguna antolatzeko elkarlanean aritu dira Larreaundi-Olaberria auzo elkartea, Irungo Udala eta AEK.
Elkarlanaren muina auzo elkartean dagoen euskara ikasgela izan zen. Auzo elkarteak euskararen erabileran eta presentzia auzoan hazi dadin lanean dabil duela bi urtetatik, hala nola, auzoko Euskara Egunarekin edota euskara ikasteko klaseekin. Hartara, Tomas Arana auzo elkarteko kideak adierazi du ez zutela inolako zalantzarik izan oraingoan ere parte hartzeko, “ilusioa” ere aipatu du. Euskararekin duten konpromisoa berretsi dute.
Egun osoko egitaraua da ondu dutena, Katean egin gisan. Goizean artisau azoka egingo da, eta segidan, txupinazoa bota eta txalapartariek auzokoei ernatzeko abisua egingo diete. Lehen ekitaldia Skola Musikeko musikarien kontzertua izango da, eta segidan, sukaldaritza tailerra eskainiko dute Larreakoek. Aurretik izena eman behar da bertaratzeko.
Eguerdian tortilla dastaketa egingo dute. Argi utzi dute ez dela txapelketa, baizik eta tortillaz gozatzeko beta eta auzotarrei dei egin diete tortillak dastatzera jaitsi daitezen. Behin sabela beteta, bizikleta martxa egingo da Balaztak gidatuta auzoan zehar. Nekeak eragingo duen gosea asetzeko, berriz, txokolatada egingo da jarraian.
Eguna bukatzeko Eguzkitza HLHI ikastetxearen patioan zirku eta dantza tailerra egingo da haur eta nerabeentzat Berdinki konpainiaren eskutik. Parte hartzeko izena eman beharra dago. Azkenik, plazatxora itzuli eta Babarrunba taldeak kontzertua eskainiko du. Runbapoteoa izango dela aurreratu dute.
Otsailak 24, Miguel eta Roberto auzogileak plazatxoan.
- 12:00eatik 14:00etara eta 17:00etatik 19:00etara: artisau azoka.
- 11:30ean: txupinazoa eta txalapartariak.
- 11:45ean: Skola Musik-en kontzertua.
- 12:45ean: sukaldaritza tailerra Larrearekin.
- Izen ematea: Admin@larrea.eus-en.
- 13:30ean: patata tortilla dastaketa auzo elkartean.
- 17:00etan: bizikleta martxa Balaztarekin.
- 18:00etan: txokolatada auzo elkartean.
- 18:30ean: zirku eta dantza tailerra Berdinki konpainiarekin Eguzkitzaren patioan.
- Bi talde: 5 eta 10 urte bitartekoentzat; eta 10 eta 16 urte bitartekoentzat.
- Aurretik izena eman beharra dago.
- 20:30ean: Babarrunba taldearekin runbapoteoa.
