Irun harro herri euskalduna dela erakusteko herri bideoa
Bideo parte hartzaile bat egiten ari dira Parean elkartea eta BDS Koop Irunen euskaldun asko daudela erakusteko. Edukiak bidaltzeko azken eguna, hilaren 22a izango da.
Korrika Irundik aterako dela baliatuta, herrian euskaraz bizi direnak lau haizetara zabaldu nahi dituzte Parean elkartean eta BDS Koopek. Horretarako bideo parte hartzaile bat egitea dute asmo eta deia haur, gazte, heldu, adineko, edota elkarte, enpresa eta kirol taldeei luzatu diete.
Interesa dutenei, beraien kabuz bideo bat grabatzea eskatu diete, horizontalean izan dadila, eta ez daitezela oso luzeak izan. Bideoak korrika2024@bdskoop.eus helbide elektronikora bidali behar dira hilaren 22a baino lehen. “Irunen euskaldun jator asko gaudela erakutsiko dugu”.
Asteburu honetan ospatuko diren inauteriak bideoa egiteko aukera ederra dela azaldu dute. “Irundarra eta euskalduna? Aspertuta halako esaldiekin? Gu, bai! Eta aurten Korrika gure herritik ateratzen dela baliatuta, euskaraz bizi garen euskaldunak lau haizeetara zabaldu nahi dugu Irun ere euskalduna badela! Irun harro herri”.
