"Oztoporik gabe" etxean egoteko, Etxera Egunak
Hilaren 25etik 27ra hitzaldiak, elkarretaratzeak, bazkaria eta kontzertuak antolatu ditu Bidasoko Sarek. Etxerako bidean "oztoporik ez" aldarri dute.
Bidasoko Sarek Etxera Egunak antolatu ditu eta urtarrilean zehar egingo dira, hilaren 25tik 27ra bitartean. Dispertsioarekin bukatuta, salbuespen politikak bukatzea da aldarri nagusia eta horretan “oztoporik ez” izatea galdegin du Sarek.
Hilaren 15ean, 18:30ean, Joseba Azkarraga Sareko bozermailea elkarrizketatuko du Alaine Aranburuk Palmera Montero gunean. Azkarragak pasa den larunbateko manifestazio nazionaleko irakurketa zabaldu zuen Anaiz Funosas Bake Bidea elkarteko bozeramailerarekin batera. “Presoak Euskal Herriko kartzeletan daude orain. Etapa hori bete dugu. Hurrengo etapa da salbuespen politika erabat amaitzea, euskal presoek etxera bidea egin dezaten ateak zabaltzea”.
Hilaren 26a hilabeteko azken ostirala da eta, ohi moduan, elkarretaratzeak egingo dira Irunen eta Hondarribian. Irungoa Zabaltza plazan izango da, 20:00etan, eta Hondarribikoa, aldiz, San Pedro kalean, 19:30ean.
Etxera Egun nagusia hilaren 27koa izango da. Eguerdian, 13:00etan, elkarretaratzea egingo dute Almudena Grandes plazatxotik (udal liburutegiaren aurrean) eta, ondoren, triki poteoan arituko dira. Jarraian bazkaria egingo dute Irungo Mendizaleak elkartean, 14:30ean eta bertaratzeko tiketa erosi behar da 20 euroan Hazian, Larraganen, 644 289 798 telefonoora deituta edo mezu elektroniko bat bidalita.
Gaua musikaren txanda izango da eta Hazian egingo dituzte emanaldiak. Protokadaverren kontzertua izango da lehena, eta Selektah Stepi eta Lilibat sound musika jartzaileek segituko dute.
