Hondarribia UEMAko udalerria da
Hondarribiarentzat egun "historikoa" dela adierazi du Igor Enparan alkateak eta UEMAn hasitako ibilbidea luzea izatea espero du.
Sei herri berri dira ofizialki UEMAko kide berri eta horietako bat Hondarribia da. Izan ere, batzar nagusia egin du UEMAk gaur goizean Orion eta bertan Udalerri Euskaldunen Mankomunitatera gehitzeko herri berriek egindako eskaerak ere onartu dituzte.
Sei horiek gehituta, 107 udalerri izatera heldu da gaur UEMA, eta guztien artean 342.000 biztanleko “lurgune euskalduna” osatzen dute UEMAko kide diren herriek.
Herri berrietako alkateek eta zinegotziek hitza hartu dute gaurkoan eta Hondarribitik Igor Enparan alkatea eta Ortzi Alonso Euskara zinegotzia joan dira. Denek bat egin dute “lanerako beharra” dagoenarekin eta “gogoa eta ilusioa” izan dute ahoetan.
Historikoki udalerri euskaldunak izan arren, ezagutzaren eta erabileraren arteko aldea murrizteko “hizkuntza politika eraginkorra eta ausarta garatzeko beharra” sumatzen dute guztiek, eta UEMAren esperientzia eta laguntza bidelagun izango dutelakoan “gustura” agertu dira mankomunitatera gehituta.
Igor Enparan: “Lehenik eta behin eskerrik asko onartzeagatik Hondarribia bezalako udalerri bat UEMAn sartzeko aukera ematea. Guretzat egun historikoa da, eta, zergatik da historikoa? herritarren borondatea, gaur, berresten delako. Udalean aurrelanketa egina bazegoen ere, herritarren ordezkariek adierazi zuten nahia mankomunitate honetan izateko eta gaur, zuek, gainerako udalerriek mankomunitatean onartu diguzue eta hori guretzako egun historikoa eta pozgarria da. Harro izango gara gure herrian ere kartela izatea herri euskalduna garela dioena eta UEMAko parte.
Izan ere, erronka handiak baditugu Hondarribian, bereziki erabilerari dagokionean. Hemen gauden udalerri berriak eta lehenagotik zaudetenak adierazgarri ezberdinak ditugu baina helburu bat badaukagu: gure udalerrietan euskaraz hitz egiteko eta bizitzeko aukera izatea egunetik egunera. Hondarribian nahia badugu, ezagutza ere baina gure herrian entzuten dena ez da euskalduna, bereziki, udara aldean. Erronka horri heldu nahi diogu uste dugulako gaurko urrats honekin bi norabidetako ekarpen bat egiteko gai izango garela. Alde batetik, UEMAk guri lagunduko gaitu dinamika berri batzuk izaten gure herrian euskaraz jarduteko eta euskararen erabilera handitzeko baina gu ere kontziente gara UEMAn ekarpena egin behar dugula eta espero dugu ibilbidea luzea izatea”.
