Gune bat osorik kulturarentzako proposatuko du EH Bilduk aurrekontuetan
Udaletxe ondoko lursail hutsean udal bulegoak batzeko eraikina eskatuko dute, eta orain arteko udal bulego horiek, kultur sorkuntzarako bideratzea.
Irungo Udalak azaroaren hasieran azaldu zuen 100 milioi euro baino gehiagoko aurrekontua izango zuela hiriak, eta ordutik, oposizioko alderdiek zuzenketak egiteko epea zabalduta dago.
Hala, EH Bildu “etorkizunari begira” jarri da eta “udal eraikin berri bat, eta kulturari bideratutako gune oso bat San Juan-Urdanibia plaza inguruan” proposatu ditu.
Koalizio subiranistak 11 milioi euroko zuzenketa aurkeztu du San Juan plazan udal eraikin berria eraikitzeko. Zehazki, udaletxearen ekialdean dagoen lursail hutsean eraikitzea da asmoa eta udal zerbitzuak espazio horretan bateratzeko helburuarekin proposatu dute. “Arloek modu koordinatuan lan egin, proiektuei zeharkakotasuna eman eta gai desberdinak modu eraginkor batean kudeatu ahal izateko” azaldu dute.
Udal bulegoak sakabanatuta egoteak “oso zaila” bilakatzen duela “gai desberdinei zeharkakotasuna eman eta modu koordinatu batean lan egitea” adierazi du Oihana Briones bozeramaileak. Hala, EH Bilduk proposatu duen eraikina “ezinbestekoa” dela dio Irunen herritarrei “modu eraginkorrean erantzungo dion administrazio moderno bat nahi badugu”.
Horrez gain, EH Bilduren proposamena “harago” doala baieztatu dute, eta gaur egun hirian zehar sakabanatuta dauden udal bulegoei beste erabilera bat emateko aukera irekiko litzatekeela uste dute. Hartara, San Juan eta Urdanibia plazen arteko ingurua “kultur sorkuntzarako gunea” izatea nahi dute.
CBAren bigarren fasea bukatzen denean “kulturari bideratutako gune berri bat” egongo dela San Juan plazan azaldu du Brionesek , baina, ondoren, Urdanibia plazan kokatuta dauden udal bulegoak udaletxe ondoan eraikitzea proposatu duten eraikinera lekualdatzea nahi dute.
Era horretan, Urdanibia plazako udal bulegoak hutsik geratu eta kultur espazioak sortu ahalko ziren. Bidasoko eragileek haien lana egiteko aukera eskainiko litzatekeela diote abertzaleek, “sinergiak sortu eta herritarrek kultur ekimen desberdinak disfrutatu ahal izateko, hala nola, erakusketak, antzerkiak, kontzertuak eta abar”. Eskualdeko talentua bultzatzeko balioko dutelakoan dira eta herritarrek kultur jarduera desberdinekin disfrutatzeko ere balioko lukeela.
