Larunbateko "ekintza matxistak" gaitzetsi dituzte
Martxoak 8 plazan bi pankarta erre eta Egiluze ikastetxeko ikasleen lanak apurtu dituztela salatu dute Emeki elkarteak eta herriko ikastetxeek. Udalak ikerketa bat abiatu du jada.
Joan den larunbateko (hilak 25, Indarkeria Matxistaren Kontrako Eguna) goizaldean “bi ekintza matxista” izan zirela salatu du Emeki Emakume Elkarteak. Talaia Eskolarekin eta Ama Guadalupekoa eta Egiluze ikastetxeaekin batera ekintza horiek gaitzesteko oharra kaleratu dute.
Ekintza matxista horiek Martxoak 8 plazan egin zituztela azaldu dute: “bi pankarta erre zituzten eta Egiluze ikastetxeko lehen hezkuntzako ikasleek egindako lanak apurtu zituzten”, diote, amorruz. Bertan sare morea josten aritu ziren larunbat goizean herriko emakumeak eta Egiluze ikastetxeko ikasleak, A25aren harira antolatutako ekintzetako bat izan zen.
Udalak ikerketa bat zabaldu berri du gertatutakoa argitzeko eta inplikatutakoak identifikatzeko. “Indarkeriazko ekintza hau dela eta, argi geratu da lanean jarraitzea ezinbestekoa dela emakume eta neska guztien eskubideak berma daitezen”.
