Irun Futsalek Gabonetako areto futbol txapelketa antolatu du
Abenduaren 22an eta 23an lehiatuko da Irungo La Salle ikastetxean. 16 taldez osatutako txapelketa eraiki nahi dute. Izen-emateak irekita daude.
Irun Futsal Gabarrari areto futbol taldeak Gabonetako areto futboleko txapelketa antolatu du. Abenduaren 22an eta 23an lehiatuko da, Irungo La Salle ikastetxean. 16 taldez osatutako txapelketa eraiki nahi dute irundarrek. Taldeek gutxienez zazpi jokalari eta gehienez hamar izan beharko dituzte, eta Irun Futsal Cup-en jokatu ahal izateko, 15 urte izan behar dira gutxienez. Irun Futsalek jakinarazi du areto futboleko arauak jarraituko dituztela txapelketan.
Abenduaren 22an, multzoen fasea jokatuko da, 16:00etatik 21:00etara. Multzoen faseak jarraipena izango du abenduaren 23an, 09:00etatik 14:00etara. Ondoren, arratsaldean, kanporaketak eta finalak jokatuko dira, 16:00etatik 20:00etara.
Izen-emateek 70 euroko prezioa dute taldeko. Parte hartu ahal izateko, inskripzio orri bat bete behar da, eta honako lekuetan jaso eta entrega daiteke: Irungo La Sallen (ostiraletan, 20:00etatik 21:30era), Gummis gozoki dendan (10:00etatik 15:00etara) eta Boga hanburgeserian (19:30etik 23:30era). Horrez gain, Irun Futsalek adierazi du beren Instagram kontura mezua bidalita edo webgunea baliatuta ere egin daitezkeela inskripzioak.
Irun Futsal Cup txapelketa bereganatzen duen taldeak honako sariak lortuko ditu: 100 euro eskudirutan, Irun Futsaleko entrenatzeko elastikoak, areto futboleko baloia, menuak Boga hanburgeserian, Gummis gozokiak eta Mtx Irun saria. Txapeldunordeak, aldiz, honakoak bereganatuko ditu: Irun Futsaleko entrenatzeko elastikoak, areto futboleko baloia eta Gummis gozokiak. Txapelketako jokalari onenak eta goleatzaile nagusiak ere sariak jasoko dituzte.
Irun Futsal Gabarrari auzoko lagun talde baten ekimenez sortutako areto futbol taldea da. Hiri handia bada ere, 1980ko hamarkadaz geroztik Irunek ez du areto futboleko talderik izan, eta hutsune hori betetzeko helburuarekin jarri dira martxan. Aurtengoa da lehiatzen ari diren lehen denboraldia, eta beren helburua da hirian eta eskualdean areto futbola ezagutaraztea eta kirol horretarako sarbidea izatea. Irun Futsal Cup bezalako txapelketekin, areto futbola ikusgarri egin nahi dute.
Informazio gehiagorako, Irun Futsalek helbide elektronikoa, Instagram kontua eta webgunea jarri ditu interesdunen eskura.
