15.649 euro bildu ditu aurtengo Beñat Elzo lasterketak
Angelman Sindromearen Elkarteari emango diote joan den hilaren 1eko lasterketan bildutako diru guztia. Klink elkartean urteroko argazkia atera dute antolatzaile eta kolaboratzaileek.
Beñat Elzo mendi lasterketa arrakastatsuak diru kopuru handia bildu du beste urte batez. Aurtengoan 15.649,14 euro bildu dituzte antolatzaileek, aurki (Angelman Sindromearen Elkartea) elkarteak jasoko dituenak.
Urteroko argazkia atera dute antolakuntzako kideek Klink elkartean asteburu honetan. Aurten ezin izan dute bazkari solidariorik egin elkartean, baina elkartekoek keinu bat egin diote kausari, eta bazkari eder batekin gozatu dute asteburu honetan joan den azaroaren 1ean egitasmoaren alde izerdia bota zuten boluntarioek.
“Antolakuntzatik eskerrak eman nahi dizkizuegu boluntario eta kolaboratzaile txiki eta ertain guztiei. Denon artean diru kopuru potolo hori lortu dugu, zuek gabe hau ez litzateke posible”!, adierazi dio HITZAri antolatzaile lanetan dabilen Mikel Garciak.
Ederra izan zen joan den azaroaren 1ekoa, 1.400dik gora lagun bildu zituen zortzigarren ekitaldiak. HITZAk orduko argazki ugari jaso zituen.
