Aurten ere Gabonetako erakusleiho ederrenek saria izango dute
Hondarribiko Gabonetako XIII. Erakusleiho Lehiaketan izena eman dezakete herriko establezimenduek dagoeneko. Hiru sari banatuko dituzte, abenduaren 20an emango dute emaitzaren berri.
Hondarribiko Udala Gabonei begira jarri da jada, eta jakinarazi du dena prest dutela Hondarribiko Gabonetako XIII. Erakusleiho Lehiaketarako. “Gure merkataritza hiriaren bizitzan integratzeko eta dekorazio hoberena duen saltokia saritzeko” probestuko dute beste urte batez txapelketa.
Izena eman nahi duten establezimenduek dagoeneko aukera dutela jakinarazi du udalak, lotura honetan egin daiteke. Publikoari irekitako saltoki guztiek ahalko dute parte hartu, baldin eta erakusleiho bat badute. Abenduaren 12ra bitarte apunta daitezke.
Garatutako gaiak Gabonetako giroarekin zerikusia izan beharko du, eta establezimenduek askatasun osoa izango dute teknikari eta estiloari dagokionez. Erakusleiho horiek abenduaren 15etik urtarrilaren 6ra bitarte egon beharko dute dekoratuta.
Diseinua, sormena eta irudi komertziala eta produktuaren aurkezpena izango dituzte kontuan epaileek. Hauek establezimendu guztiak bisitatuko dituzte, eta abenduaren 20an jakinaraziko dute emaitza.
Irabazleak 450 euroko saria jasoko du; bigarrenak 300 eurokoa; eta hirugarrenak 200 eurokoa.
