Energia eskuragarriaz eta ez kutsatzaileaz aritu dira Eskola Foroan
Herriko ikastetxeetako ikasleak alkatearekin eta zenbait zinegotzirekin bildu dira, Eskolako Agenda 2030ean egiten ari diren lana aurkeztu eta galderak egiteko.
Aste honetan Eskolako Agenda 2030 Foroa elkartu da udaletxeko pleno aretoan. Herriko ikastetxeetako ikasleek egiten ari diren lana aurkeztu diete Igor Enparan alkateari eta Lupe Queiruga eta Ortzi Alonso zinegotziei. Galdera ugari egin dizkiete, bereziki, energia eskuragarria eta ez kutsatzailearen gainekoak. Iaz udalerriaren diagnostikoa egin zuten ikasleek, eta aurten, ekintza plana garatzea tokatuko zaie.
Alkateak eskerrak eman dizkie ikasleei “egiten ari diren lanarengatik eta udal ordezkariei lan guztia aurkeztu eta prestatzeagatik. Oso garrantzitsua da egiten ari zaretena, etorkizuna zuen eskutan dago eta”, esan du.
