Airearen kalitatea neurtuko duen ekipamendua jarriko dute
Kolon pasealekuaren eta Gipuzkoa hiribidearen artean jarriko dute bat, eta beste definitzeke dago. Sare bat sortzea da xedea.
Irungo airearen kalitatea neurtzeko unitate mugikor bat instalatu du gaur Eusko Jaurlaritzaren Airearen Kalitatea Neurtzeko Sareak. Instalazio hori Irunen emisio baxuko eremu bat garatzeko proiektuaren parte da.
Proiektuaren xedea airearen kalitatea hobetzea da eta, horretarako, hiriko airearen kalitatea zein den behar da jakin. Neurketa hori “obligazioa” dutela adierazi du Borja Olazabal udal ordezkariak eta helburu hori lortzeko beste hainbat politikaren berri eman du: “hala nola, erdiguneko zenbait kaletako zirkulazioa itxi eta oinezkoentzako egokitzea”.
Neurgailu mugikor bat instalatu dute oraingoan baina sare bat osatzea da asmoa, sentsore finkoekin. horrela, trafikoa analizatu, aztertu eta modelizatuko dute.
Estazio mugikorrak etengabe egiten ditu neurketak, eta informazio Jaurlaritzaren Airearen Kalitatea Kontrolatzeko Zerbitzuak lantzen du. Gero, lortutako datuak txosten batean jasoko dituzte, eta udalari igorriko diote, neurketa kanpaina amaitzen denean.
Unitate mugikorrekin bi kanpaina egingo dituzte bi kokaleku ezberdinetan, eta kanpaina bakoitzak bi hilabete iraungo ditu. Era horretan, bi lekutako baldintza atmosferiko aldakor eta desberdinak jasoko dituzte.
Kolon pasealekuaren eta Gipuzkoa hiribidearen artean izango da kokaleku bat, azarotik urtarrilera; eta martxotik maiatzera. helburuak zirkulazioari lotutako parametroak neurtuko dituzte.
Beste lekua ez dute oraindik erabaki, baina bai datak: otsailetik martxora, eta maiatzetik ekainera. Neurketa horren xedea zirkulazioaren loturarik ez duten parametroak neurtzea da.
