EH Bilduk bat egingo du Palestinaren aldeko gaurko mobilizazioekin
Gatazkaren irtenbide "elkarrizketatu eta iraunkorra" aldarrikatzera deitu ditu koalizioak herritarrak eta alderdiak.
Gernika-Palestinak egindako deiarekin bat egin eta gaur, 19:00etan, elkarretaratzea egingo dute Irungo San Juan plazan herritarrek. Deialdiaren aurrean EH Bilduk parte hartuko duela iragarri du, “Palestinaren egoera salatu, elkartasuna adierazi, eta gatazkaren irtenbide elkarrizketatu eta iraunkorra aldarrikatzeko”.
Koalizioak gainontzeko alderdiei eta.herritarrei parte hartzeko deia luzatu diete nazioarteko komunitateari “mezu garbi bat” helarazteko xedez: “Sarraski honen aurrean nazioarteko komunitatea ezin da isilik gelditu, esku hartu behar du”. Gaur erantzun bateratua egitera bultzatu ditu herritarrak
Azken 75 urteko gatazka dela gertatzen ari dena azaldu du EH Bilduk eta Nazio Batuen ebazpenak “sistematikoki urratu diren” gatazka ere badela erantsi dute. “Nazioarteko komunitateak bake justu eta iraunkor baten alde lan egin behar du, elkarrizketa eta negoziazio prozesu bati ateak irekitze aldera”.
Bakea Palestinaren okupazioa bukatzearekin iritsiko dela dio koalizioak eta, horretarako, herri okupatuaren “eskubide nazionalak aitortzea ezinbestekoa” dela diote, “estatu independente bat izateko eskubidea barne”. Ildo horretan, Gazako zerrendan “helburutzat duen edozein operazio militar gelditzea” galdegin dute.
20 urteko blokeoa pairatzen duela Palestinak azaldu du Gorka Berasategi zinegotziak eta bertako herritarrak “zigor kolektibo baten biktima” direla salatu du. “Egunero ikusten eta entzuten ditugun testigantzek sakonki mintzen gaituzte”.
Berasategiren hitzetan Gazako herritarrek jasan dituzten giza eskubideen urraketak “zenbatezinak” dira. “Bonbardaketak, kazetarien erailketak, ura, elektrizitatea, erregaia edota komunikazioen eteteak… Onartezina da. Nazioarteko komunitateak ezin du sarraski honen aurrean geldirik jarraitu”.
