Txingudi Errugbi taldeak beste lehia asteburu bat du aurretik
Biok Txingudik etxean jokatuko du, 14 urtez azpikoak Hernanira joango dira, eta Aritz Arrieta Autonomien Txapelketan arituko da 16 urtez azpikoetan.
Txingudi Errugbi taldeak beste lehia asteburu bat du aurretik. Eskualdeko emakumezkoen errugbi taldeak Gaztedi B jasoko du larunbatean 16:00tan Plaiaundin. Biok Txingudik Maier Aia, Ainara Gerriko eta Lea Etxebarrieta izango ditu faltan partida honetarako.
Saran jasotako porrotak “sentsazio gazi-gozoak” izan zituzten Biok Txingudiko jokalari eta prestatzaileek taldearen hitzetan. “Ondo jokatu bazuten ere, Sarako Izarra uste baino aurkari indartsuagoa izan zen. Emaitza honekin, Iparraldeko taldea, Biok Txingudi eta Gaztedi B, bidasoarrek larunbat honetan izango duten aurkaria, berdinduta daude sailkapenean”.
Gasteiztarrek emakumezkoen bi talde sortu dituzte aurten eta hori lehen aldia da taldearentzat. Izan ere, pasa den astean bien arteko norgehiagoka jokatu zuten, A taldea garaile izanik.
14 urtez azpikoak, berriz, Hernanira joango dira. Liga hasiera geroz eta gertuago dute eta prestatzen segitzeko aukera da asteburu honetakoa. Txingudiko gaztetxoek larunbat honetan, 10:30etatik aurrera, bi lagunarteko jokatuko dituzte Hernaniko Landare zelaian etxeko taldearen eta Zarautz/Beltzaken aurka.
Larunbat honetan, gainera, Euskadiko 16 urtez eta 18 urtez azpiko selekzioek Autonomien Txapelketa hasiko dute Bilbon Andaluziaren kontra. 16 urtez azpiko taldean, 11:30etan jokatuko duena, Aritz Arrieta Txingudiko jokalariak hartuko du parte.
