'18 cm' erakusketak baditu irabazleak
Irabazleen eta aurkeztu diren lan guztien erakusketa azaroaren 12ra arte izango da zabalik Amaia Kultur Zentroan
18 cm arte erakusketaren seigarren edizioan baditu irabazleak. Orotara 102 lan aurkeztu dituzte 48 egilek. Horietatik 51 bakarkakoen sailekoak izan dira, eta beste 51k serieen kategoriakoak (hemezortzi serie aurkeztu dituzte). Pintura sailekoak izan dira lan gehienak, 67 guztira. Lan den-denak gai zehatz baten gainean egin behar ziren Caleidoscopio-Aniztasuna. “Sorpresa atsegin bat hartu dugu, aurten aurkeztutako obren kopurua iazkoa halako bi izan baita”, esan dute udaletik.
Irungo Udaleko Kultura arloak Ana Zubikoa komisarioarekin eta Ricardo Catalan produktorearekin batera antolatu du erakusketa. Saritutako lanak zein beste guztiak ikusi nahi dituztenek, hilaren 12ra arteko epea dute. Amaia KZko erakusketa aretoan daude formatu txikiko horiek guztiak: astelehenetik larunbatera 18:00etatik 21:00etara, eta igande eta jaiegunetan 11:30etik 13:30era dago zabalik erakusketa.
Hartara, honakoa da 18 cm erakusketaren barruan antolatutako lehiaketaren palmaresa:
- Pintura onenarentzako saria (300 euro eta diploma): Xabier Illarregi Arruabarena irundarrarentzat, Aurpegiak lanagatik.
- Argazkirik onenarentzako saria (300 euro eta diploma): Josu Pikabea Barberena donostiarrarentzat, Izengabea lanagatik.
- Eskulturarik onenarentzako saria (300 euro eta diploma): Luis Zabala Mendia donostiarrarentzat, Calidoscopio lanagatik.
- Ikus-entzunezkorik onenarentzako saria (300 euro eta diploma): Xabier Illarregi Arruabarrena irundarrarentzat, Caledoscopio lanagatik.
- Serierik onenarentzako saria (300 euro eta diploma): Guadalupe Amunarriz Emazabel hondarribiarrarentzat, Sustraiak bota nahian serieagatik (hiru piezakoa).
- Tamayo Saria (Donostiako Tamayo dendan baliatzeko 180 euroko erosketa bonua): Sara Rubio Isasi Zizur Nagusiko (Nafarroa) herritarrarentzat, Formas de ver lanagatik.
