Argentinako musika folklorea Irunen, Chechelos bikotearekin
Larunbatean hitzaldia eskainiko dute Ametsa Abesbatzaren elkartean, eta igandean, kontzertua eskainiko dute Irungo Kontserbatorioan.
Chechelos biolentxelo jotzaile bikote argentinar bat da eta Irunen izango dira bihar, etzi eta hilaren 29an. Taldearen kideak dira Ramiro Zarate eta Mauro Sarachian.
Bihar, master class saioak emango dizkiete Irungo Kontserbatorioko ikasleei, baina hurrengo egunetan bestelako ekintzak egingo dituzte. Larunbat honetan, hilak 28, 12:30ean, Zugarramurdin arituko dira eta 19:00etan, Argentinako folkloreari buruzko hitzaldia eskainiko dute Irungo Ametsa Abesbatza Kultur Elkartearen lokalean. Sarrera doan da, lekua bete arte.
Amaitzeko, igandean, urriak 29, 12:00etan eta Irungo Kontserbatorioan, kontzertu bat eskainiko dute. Kontserbatorioko hari orkestrarekin landutako bi pieza joko dituzte, besteak beste.
Chechelos
Zarate eta Sarachianek folklore errepertorio instrumentala eta kantatua jorratzen dute, abesti propioekin, Argentinako herri kantutegiko klasikoen jatorrizko moldaketekin eta folklorista gazteen konposizioekin. Taldea 2015ean jaio zen, 2016an ofizialki debutatu zuen eta 2017an lehen diskoa argitaratu zuten.
