Gipuzkoan Gazte Tour Hondarribira iritsiko da, abenduaren 2an
Kultur programazio erakargarria eskaintzeko helburua du programak. Itsas Etxeko oholtzara Depol, Hilario eta Skubi taldeak igoko dira.
Gipuzkoan Gazte Tour musika eta arte eszenikoen inguruan hainbat ekimen biltzen dituen programa da eta Gipuzkoako Foru Aldundiak beste hainbat eragile eta udalekin elkarlanean sortu dute. Bere helburu nagusia da 16 eta 25 urte arteko nerabe eta gazteei kultur programazio erakargarria eskaintzea, “ikuskizunaren parte” senti daitezen saiatuz.
Ez da lehen edizioa eta aurtengoa apirilean jarri zen martxan. Gaur gaurkoz hiru saio geratzen dira eta abenduaren 2an Hondarribira iritsiko da. Itsas Etxean izango dira emanaldiak eta oholtza horretara igoko dira Depol, Hilario eta Skubi banda hondarribiarra. Kontzertuak 20:00etan hasi eta 23:00etan bukatuko dira. Sarreran prezioa 3 eurokoa izango da eta dagoeneko salgai daude.
