'Oroimen haziak' mapa interaktiboa kaleratu du Jaizkibel Konpainiak
Azken mende laurdenean pasatakoa jasotzeaz gainera, "paseo eder" bat sortu dute, konpainiaren historia "memorian gera dadin".
Orain del urtebete, 2022ko urriaren 22an hain zuzen ere, Loratzen eguna ospatu zuen Jaizkibel Konpainiak. Hazi bat landatu zuten konpainiako kideek orduan eta “malkoz, irriz, beldurrez eta alaitasunez betetako mende laurdena harrotasunez” ospatu zutela gogorazi dute. Orduko hartan paseo historiko bat egin zuten (Maria Jose Noain Maura eta Ilargi Bengoetxea Gartzia historialariekin) eta orain, konpainiaren historia jasotzen duen ibilbide historikoa aurkeztu du Jaizkibelek.
Konpainiakoen arabera, “argazki gordinekin” osatutako mapa interaktibo bat kaleratu dute, Oroimen haziak izenekoa. Parean elkartearen eta Eider Eibar ilustratzailearen laguntzarekin sortu dute mapa hori. Mapa horretan, gainera, paseo berezi bat sortu dute, eta honekin “Jaizkibel Konpainiaren, alarde parekidearen aldeko borrokaren eta Hondarribiko historiako bestelako egite historikoak ezagutarazi” nahi dituzte, “mende laurden pasatxo honetan bizitakoa memorian gera dadin”.
Mapa honetan testuak, audioak, argazkiak, PDF dokumentuak eta ilustrazioak ikusi eta kontsultatu ahalko dira. Historiako pasarte bakoitza hirigune historikoko puntu bati lotuta agertzen da, “jazotakoa indartuz” batetik, eta oinez egin daitekeen aipatutako “paseo eder” hori sortuz bestetik. Ibilbidetxo hori bakoitzak nahi duenean eta nahi duen bezala egiteko aukera ematen duela azaldu du konpainiak. Halere, paseo kolektibo bat ere egingo dutela iragarri dute, “berriz elkartu, ospatu eta elkarrekin ikasteko” asmoz. Azaroaren 19an izango da (igandea da) hitzordua, 11:00etan, Arma Plazan. Bertan izango dira berriro Noain eta Bengoetxea historialariak.
Mapa kontsultatu nahi dutenek atari honetara jo beharko dute.
