Herriko Udal Euskaltegiak, martxan
Ikasturte berria hasi dute herriko udal euskaltegiek. 232 ikasle ari dira aurtengoan, goiz edo arratsaldez eskaintzen ari diren klaseetan.
Hondarribiko Udal Euskaltegiek ikasturte berria hasi dute dagoeneko, martxan dira. Gaur bertan eman dute horren berri Igor Enparan alkateak, Ortzi Alonso Euskara zinegotziak eta Arantxa Ezeiza Euskaltegiko zuzendariak.
Alonsoren arabera, euskaltegiak “ezinbesteko zerbitzu” dira: “iazko zifren antzera, aurten 230etik gora dira euskara ikasten edo bere maila hobetzen lanean ari diren herritarrak. Ordutegi zabala eskaintzen da, goiz eta arratsaldekoa, eta maila guztiak jasotzen ere”, esan du. Orotara, 232 ikasle apuntatu dira aurten.
Gaurkoan gaineratu dutenez, ikasle gehienen helburu nagusia lanerako baliatuko duten titulu ofiziala lortzea da. Aurten bereziki A1 mailarako C1 maila emateko eskaera handitu dela gaineratu dute, baina halere , “hitz egin ahal izatea eta euskara ulertzea” ere helburu dutela aitortu dute. Horregatik, mintzapraktika klaseetako ariketetan txertatzeaz gainera, kanpo ekintza batzuk ere antolatuko dituzte ikasturte honetan zehar.
Euskaltegiko zuzendariaren arabera, iaz bezala, matrikula zabalduko dute aurtengoan ere. Urtarrilaren 22tik 26ra izango da, otsailean ikastaroan sartu nahi dutenentzat.
