Euskarazko zinemaz gozatu ahal izango da Mendibilen
Irungo Udalak bigarrenez abiatu du 'Zinema haur eta gazteentzat' zikloa. Euskarazko 20 film proiektatuko dira hilaren 28tik abenduaren 30era, doan.
Nuria Alzaga Irungo Udaleko Euskara ordezkariak Zinema haur eta gazteentzat zikloa aurkeztu du gaur Ocine Mendibil zinemetan. Euskara arloak ondutako egitasmoak aukera emango die Irungo familiei haurrentzako euskarazko proiekzioez doan gozatzeko. Saio guztiak Mendibilen izango dira, 16:00etan.
Iazko “arrakastaren” ondoren, aurten zikloa berriro antolatzea erabaki dutela adierazi du Alzagak. Aurtengo programa iazkoa baino “zabalagoa eta oparoagoa” izango dela aurreratu du Euskara ordezkariak. Aurten haur eta gazteei zuzendutako 20 film proiektatuko dira, 15 bikoiztu eta 5 original euskaraz.
Zinema zikloa datorren larunbatean hasiko da, hilak 28, 16:00etan, eta estreinako filma Abentura erraldoia izango da. Programazioa abenduaren 30ean itxiko da Pikachu detektibea filmarekin.
Iazko ekitaldiarekin alderatuta, aurtengoak berritasun bat duela jakinarazi du Alzagak, bi film Eguberritan proiektatuko baitira. Eguberritan haurrekin zinemara joateko dagoen ohitura ikusita, antolatzaileek bi film programatu dituzte data horietarako: Space Jam abenduaren 28an eta Pikachu detektibea abenduaren 30ean. Eguberrietako bi saioetara joan nahi dutenek egunean bertan lortu ahal izango dituzte sarrerak Mendibileko zinemetako leihatiletan, 15:00etatik aurrera.
Sarrerak
Proiekzio guztiak ikusteko sarrerak doakoak dira, eta horiek lortzeko sistema honakoa dela azaldu du Alzagak: ostiralero, 15:30etik aurrera, Mendibileko leihatilan asteburu horretako proiekzioei dagozkien sarrerak egongo dira eskuragarri. Ostiralean banatu ez diren sarrerak, aldiz, asteburuan jarriko dira salgai leihatilan, 15:30etik 22:00etara. Antolatzaileek gogorarazi dute pertsona bakoitzak lau sarrera har ditzakeela gehienez, eta sarrerak hartzerakoan, “arduraz” jokatzeko deia egin dute.
Hona hemen programazio osoa:
- Urriak 28: Abentura erraldoia.
- Urriak 29: Hopper oilaskoerbia.
- Azaroak 4: Superheroien familia.
- Azaroak 5: Berpiztu.
- Azaroak 11: Mavka: Basoaren zaindaria.
- Azaroak 12: Dragoiaren gidaria.
- Azaroak 18: Lau ahizpa magikoak.
- Azaroak 19: Zipi eta Zape: Kaniken kluba.
- Azaroak 25: Tom eta Jerry.
- Azaroak 26: Small foot.
- Abenduak 2: Yoko oporretan.
- Abenduak 3: Dardara.
- Abenduak 9: Unicorn wars.
- Abenduak 10: Handia.
- Abenduak 16: Momiak.
- Abenduak 17: Irati.
- Abenduak 23: Zutik!
- Abenduak 26: Maya erlea – Urrezko esfera.
- Abenduak 28: Space Jam.
- Abenduak 30: Pikachu detektibea.
