Beldur Barik lehiaketa, martxan
12 eta 20 urte bitarteko gazteei zuzenduta dago, eta helburua da indarkeria matxistaren ekintzak eta jarrerak prebenitzea eta errespetuan, tratu onean eta berdintasunean oinarritutako harremanak sustatzea. Parte hartzeko, gehienez hiru minutuko bideoak aurkeztu behar dira azaroaren 10a baino lehen.
Irungo Udaleko Berdintasun arloak jakinarazi du martxan dela beste urtez batez Beldur Barik izeneko lehiaketa. Egitasmo hori 12 eta 20 urte bitarteko gazteei zuzenduta dago, eta helburua da indarkeria matxistaren ekintzak eta jarrerak prebenitzea eta errespetuan, tratu onean eta berdintasunean oinarritutako harremanak sustatzea.
Aurtengo ekitaldiak ‘Beldur Barik jarrera’ aldarrikatu nahi duela azaldu du udalak. Jarrera horren asmoa da gazteek beren bizitzako esparru guztietan jasaten duten indarkeria sexistaren agerpenak ikusaraztea, haien eguneroko testuinguru eta espazioetan hautematen den desberdintasunaren ondorio den aldetik.
Lehiaketara aurkez daitezkeen lanak ikus-entzunezko formatuan aurkeztu behar dira. Gehienez hiru minutuko iraupena izan beharko dute bideoek, kredituak barne.
Horrez gain, kalitate teknikoaren edo artistikoaren gainetik, transmititzen den mezuaren kalitatea baloratuko dela adierazi du udalak, eta baita zenbateraino gai den ere gogoetak eta eztabaidak pizteko nesken ahalduntzeari buruz eta mutilen matxismoaren kontrako konpromisoari buruz.
Lehiaketari dagokionean, hiru mailetan banatu dute:
- 1. maila: 2010 eta 2011 urteen artean jaiotakoak (2023an 12tik 13ra betetzen dituztenak).
- 2. maila: 2005 eta 2009 urteen artean jaiotakoak (2023an 14tik 18ra betetzen dituztenak).
- 3. maila: 2003 eta 2004 urteen artean jaiotakoak (2023an 19tik 20ra betetzen dituztenak).
Maila bakoitzeko irabazleak 400 euro irabaziko ditu, eta parte hartzen duten bideo guztiek, aldiz, 100 euro. Izen-emateak irekita daude eta epea azaroaren 10ean itxiko da. Parte hartzeko Irunen erroldatuta egon edo Irungo ikastetxe batean ikasle izan behar da. Oinarriak eta eta lehiaketaren inguruko informazioa Beldur Barik-en webgunean aurki daitezke.
