Guztion Alardeak bildutako sinadurak jasoko dituzte bihar Abotsanitz, EH Bildu eta PSE-EEk
Orain arte (bihar arte sinatu daiteke) 1.900 hondarribiarren babesa jaso du egitasmoak. 19:00etan izango da biharko hitzordua, udaletxeko arkupetan.
Joan den uztailean Guztion Alardea taldeak “alardearen konponbidearen alde” abiatutako sinadura bilketari bukaera emango diote bihar (hilak 6), ekitaldi batekin. Udaletxeko arkupetan (19:00etan) jarri dute hitzordua, orain arte jasotako 1.900 sinadura inguru horiek entregatzeko. Igor Enparan alkateaz gainera (Abotsanitzen izenean), EH Bildu eta PSE-EE taldeak bertan izango direla aurreratu du taldeak, sinadurak jasotzeko. Gainera, “batzuk azken momentura arte itxaron dutela ikusita”, bihar ere sinatzeko aukera izango da, 18:00etatik aurrera udaletxeko arkupetan ere.
Alarde Fundazioari ere sinadura horiek entregatzeko asmoa dute taldekoek, bihar ere, baina fundazioak ez dio gonbidapenari erantzunik eman.
Azkenik, biharkoaren harira, aipatu dute emaitzarekin “oso pozik” daudela, “eta herri hau behin eta berriz erakusten ari dela gatazka honi bukaera emateko duen desira. Aurreko urteko argazkian 1.000 pertsona inguru elkartu baginen, aurten 1.900 sinadura inguru jaso ditugu, babesa ia bikoiztuz. Orain da momentua, konponbidearen alde dagoen hondarribiar oro biharko ekitaldira bertaratzera gonbidatzen dugu”.
