PSE-EEk hiru mozio erregistratuko ditu biharko osoko bilkuran
Hiria "tenkatutako eremu" izendatzea, Pedro Muguruzaren plaka zaharberritu eta erretiratzea eta urriaren 31eko urteko oroitzapenari atxikitzea eskatuko dute.
Hondarribiko PSE-EE taldeak hiru mozio erregistratuko ditu biharko osoko bilkuran. Lehenik eta behin, hiria “tenkatutako eremu” izendatzeko eskaera egingo dute, “alokairuzko pisuen prezio altuak” baitira haien ustez. Hiri osoa ez bada, bertako zenbait gune hala izendatzeko eskatuko diote udal gobernuari, jaurlaritzari eskaera ofiziala egin diezaioten. Noemi Odriozola ordezkariaren arabera, “logelen emergentziazko egoera batean dago Hondarribia, bataz besteko alokairu prezioa 900 euro denean eta Etxebiden eskaera handia dagoenean”.
Bigarren mozioan Pedro Muguruzaren omenezko plaka “zaharberritu eta erretiratzeko” eskatuko dute sozialistek, Memoria Demokratikoaren Legea aplikatuz. Hala, “udal artxibora edo aztarna gisa gorde behar den beste bulego batzuetara eramateko” eskatuko dute biharko saioan. Joan den abuztuan plaka ezabatu zuten, eta jokaera horrekin “2018ko ekaineko udal akordio bat urratu” dela salatu dute. “Akordio hartan erabaki zen plaka hari argigarri gisa beste bat jarriko zitzaiola, Hondarribiko biztanleei begira, baina ez zen hala izan”. Horregatik guztiagatik udal gobernuari eskatuko diote prozeduran errektifikatu dezatela, “legearen arabera eta gainerako taldeekin kontsentsu handiago batera helduz”.
Hirugarrenik eta azkenik, urriaren 31ko urteko oroitzapenera atxikitzeko eskatzeko mozioa erregistratuko dute bihar. Taldeak adierazpen instituzional bat aurkeztuko du, udalak bat egin dezan kolpe militarraren, 1936ko Gerraren eta frankismoaren biktima guztiak “gogoratzeko eta omentzeko eguna” izan dadin. “Oroimen egun hau ospatzea lagungarria da 1936ko uztailaren 18ko estatu kolpean, gerran eta diktaduran gertatu ziren giza eskubideen urraketak berriz gerta ez daitezen”.
