Emakume Palisten Topaketa Inklusiboa egingo dute larunbatean
Emeki Emakume Elkarteak goiz osoko egitaraua antolatu du larunbaterako. Parte hartu nahi dutenek izena eman beharko dute aldez aurretik.
Ohiko jardunera itzuli da pilotalekua. Larunbat honetan (hilak 30) Emakume Palisten Topaketa Inklusiboa egingo dute Jostaldi pilotalekuan, Emeki Emakume Elkartearen egitasmoz.
10:00etan ekingo diote biharko egitarauari, aurkezpen batekin. Ondoren, ariketak egingo dituzte bertaratutakoek, motorrak berotzen hasteko. 11:45ean berriz, sabelak ongi beteko dituzte, 12:15ean hasiko diren partidetarako prest egon daitezen kirolariak. 13:45ean bukatutzat emango dute topaketa inklusiboa.
Parte hartu nahi duten herritarrek izena eman beharko dutela jakinarazi du emakume elkarteak, atari honetan. Partaideez harago, ikusleei dei egin diete, «palistak txalotzera» joan daitezen.
