Herriko bazterrak argituko dituzte, "denok seguru senti gaitezen"
'HONDargia, Hondarribiko bazterrak argituz, denok seguru senti gaitezen' izeneko proiektua aurkeztu dute Emeki elkarteak eta udalak. Hiriko puntu beltzak identifikatuko dituzte, "elkarlanean, hiri seguru bat sortzeko" asmoz.
Gaurko aurkezpenaren irudia. Emeki Emakume Elkartearen eta udalaren egitasmoz, “pertsona guztien segurtasuna eta bereziki emakumeena arriskuan jar dezaketen herriko zonaldeak identifikatzeko” proiektu bat abiatu berri dute. HONDargia, Hondarribiko bazterrak argituz, denok seguru senti gaitezen izena jarri diote proiektu honi. Gaur aurkeztu dute udaletxean Josu Peña zinegotziak, elkarteko presidente Tamara Sastrek eta elkartea dinamizatzen duten teknikari Leire Martinez eta Diana Arboniesek.
Lehenik eta behin, Peñak eskerrak eman dizkie elkarteko emakumeei, “Hondarribian erreferente bihurtu” baita Emeki. “Guretzat ohorea da emakumeen eskubideen alde lan egiten duen elkarte baten eskutik lan egitea. Oso proiektu interesgarria eta beharrezkoa da, eta ziur gaude gizarte kohesioan lagunduko duela. Argi daukagu fruituak emango dituela”, esan du zinegotziak.
Sastrek gaineratu duenez, “oso proiektu garrantzitsua” izango de elkartearentzako. Duela 11 urte ekin ziotela azaldu du: “lan handia zegoen orduan, baina urte hauetan oso gutxi egin da. Horregatik, aldundiaren diru laguntza bati esker, berriro mugitzen ari gara”. Equala Iniciativas eta La Crafetera enpresen laguntza jasoko dute.
Arboniesek proiektuaren gaineko xehetasunak eman ditu. Azaldu duenez, “edozein pertsonak hirian lasai pasatzea lortu” nahi dute. Proiektua egiteko hiriko hainbat barruti eta eskolatako datu eta iritzi esanguratsuen bilketan eta analisian oinarritu dira. Hiru helburu nagusi ditu proiektuak: espazio publikoen hobekuntza eta erabilera egokia sustatzea, hiriko kaleetan segurtasunez ibiltzea eta herritarrak hiri zaintzaren inguruan sentsibilizatzea”.
Helburu horiek lortzeko herritarren parte hartzea “funtsezkoa” dela gaineratu dute gaurko aurkezpenean. Horretarako, webgune berri bat sortu dute eta bertan urriaren 25era bitarte galdetegi bat erantzun ahalko da. Puntu beltzei buruz herritarrek dituzten ideiak, iradokizunak eta esperientziak partekatzeko gunea izango da, “elkarlanean, hiri seguru bat sortzeko”. Proiektuarekin herriko hainbat eremu “nabarmen” hobetuko dituela uste du elkarteak, eta ondorioz, “herritarrok dugun segurtasun sentsazioa areagotuko” dela.
