Puntu baliotsua denboraldia hasteko
Bidasoa Irunek ezustekoa eman eta berdinketa lortu zuen larunbatean Artalekun Bartzelonaren aurka (26-26). Hasiera bikaina eman diote Asobal Ligari.
Argazkia: Arrate Morales. Hasiera bikaina eman dio Bidasoa Irunek Asobal Ligari. Irundarrek larunbatean hasi zuten Artalekun 2023-2024 denboraldiko bidea azken denboraldietan nagusi izan den Bartzelonaren aurka, eta puntu baliotsua erdietsi zuten (26-26).
Lehen zatian nor baino nor aritu ziren bi taldeak. Kataluniarren hasierako abantailei ezin hobe erantzun zieten bidasoarrek, eta Esteban Salinasen gol bati esker, irundarrak aurretik jarri ziren lehen aldiz markagailuan 4. minutuan (4-3). Bi taldeen arteko lehia oso estua izan zen, baina atsedenaldira iritsi aurreko azken sei minutuetan Bidasoak airea hartu zuen markagailuan. Mikel Zabalaren eta Iñaki Caveroren golei esker, 2-0eko aldeko partziala lortu zuten bidasoarrek. Defentsan fin aritu ziren irundarrak, eta Medhi Harbaoui atezaina, bikain atepean. Bolada horrez baliatuta, hiru goleko aldearekin iritsi ziren atsedenaldira Jacobo Cuetararen mutilak (16-13). Azken urteetan Artalekun ikusi den lehen zati onenetakoa eskaini zuten jokalariek.
Bigarren zatia ere ezin hobe hasi zuten etxekoek, eta lehen zatiko formula errepikatuz, 39. minutuan lau goleko aldea lortu zuten irundarrek markagailuan (21-17) beteta zegoen Artaleku batez lagunduta. Hogei minutu aurretik eta aurkaria Bartzelona zela ikusita, partida irekita zegoen. Hala ere, Gorka Nietoren bi goli esker, bidasoarrek lau goleko errenta mantendu zuten. Norgehiagokaren azken minutuak, baina, oso gogorrak izan ziren, Bartzelonak bere erritmoa inposatu baitzuen. Azkenean, Bidasoa gai izan zen aurkarien bultzada horri eusteko, eta urrezko puntu bat lortu zuten ligako talde indartsuenaren aurka (26-26).
2002ko martxoaren 10a izan zen Bartzelonaren aurkako partida batean punturen bat Artalekun geratu zen azken aldia. Duela 21 urte Aitor Etxaburuk gidatutako taldea 29-25 gailendu zen Kataluniarren kontra.
Asobal Ligako estreinako partida jokatuta, irundarrak larunbatean, hilak 16, itzuliko dira lehiara. Kantabrian jokatuko dute, Bathco Torrelavegaren aurka, 19:00etan.
