Irun Hiria Kutxa Literatura Sariak baditu irabazleak
Lehiaketaren 45. ekitaldira 331 lan aurkeztu dira eta 70.000 euro banatu dira saritan. Sari banaketa ekitaldia azaroaren 24an izango da, Amaia KZn.
Larunbatean Irun Hiria Kutxa Literatura Sariko 45. ekitaldiko irabazleak ezagutarazi ziren Irungo udaletxean. Orotara, 331 lan aurkeztu dira aurtengo lehiaketara: euskarazko 21 eleberri, euskarazko 17 poesia, gaztelaniazko 182 eleberri eta gaztelaniazko 111 poesia. Parte hartzeari dagokionean, obra gehienak Euskal Herritik jaso dira. Euskal Herritik jaso diren lanen %70a Gipuzkoatik iritsi dira, eta euskaraz aurkeztu diren lanen %65a ere Gipuzkoatik dator.
Guztira, 70.000 euro banatu dira saritan: 40.000 euro eleberriaren modalitatean, eta 30.000 euro poesian. Horrez gain, saritutako lanak editatu eta argitaratu egingo dira. Irabazleak ezagutarazi badira ere, sari banaketa ekitaldia azaroaren 24an izango da, Amaia Kultur Zentroan.
Hona hemen Irun Hiria Kutxa Literatura Sariko 45. ekitaldiko irabazleak:
- Euskarazko eleberria: Xabier Lasa Gorraiz, Ura ez baita gardena.
- Euskarazko poesia: Jon Gerediaga, Zeru-lurren liburua.
- Gaztelaniazko eleberria: Martha Asuncion Alonso, Cartas a Nensi.
- Gaztelaniazko poesia: Andres Garcia Cedran, Equipos de respiración subacuática.
Irabazleak erabakitzeaz gain, epaimahaiak aipamen bereziak egiteko eskubidea zuen, eta aukera hori baliatu zuten, bi aipamen berezi egin baitzituzten. Euskarazko eleberrian epaimahaiak Joxean Agirreren Gizon barregarriak lana aitortu zuen. Gaztelaniazko eleberrian, aldiz, Marc Colell Enrichen Reino vegetal obra errekonozitu zuen epaimahaiak.
