Garaipen argia lortu du Real Unionek
Txuri-beltzek sasoiko bigarren garaipena lortu zuten bart Rayo Majadahonda jipoitu ondoren (4-0). Sasoia ezin hobe hasi dute irundarrek.
Argazkia: Unai Zabaleta. Iragan astean ligako bigarren jardunaldian Bartzelona B-ren aurka galdu ondoren (2-1), garaipenaren bidera itzuli da Real Union; eta nola gainera, txuri-beltzek Rayo Majadahonda jipoitu baitzuten bart Galen (4-0). Partidaren atarian Fran Justo prestatzaileak argi esan zuen porrot baten ondoren garrantzitsua dela puntuak lehenbailehen pilatzea. Esan eta egin. Atzoko garaipenari esker, irundarrak hirugarren dira sailkapenean. Jokoan izan diren bederatzi puntuetatik sei erdietsi dituzte, denak etxean. Lidergoan Ponferradina da, zazpi punturekin.
Atzoko partida 30. minutuan Rayo Majadahondako Juanjo jokalariari ateratako txartel gorriak markatu zuen. Lehen zatia zen, eta irundarrek ordubetez jokalari bat gehiagorekin jokatu zuten. Jagoba Beobideri egindako sarrera gogor baten ondoren ikusi zuen txartel gorria Juanjok. Hortik gutxira, 40. minutuan, Solisek Real Union aurretik jarri zuen, eta lehen zatia bukatzear zela, Escobarrek irundarren bigarren gola sartu zuen. 2-0eko markagailuarekin iritsi zen norgehiagoka atsedenaldira.
Real Unionek ezin hobe hasi zuen bigarren zatia, eta lehen jokaldian Solisek txuri-beltzen hirugarren gola sartu zuen. Partida azkar bideratu zuten irundarrek sasoiko bigarren garaipena lortzeko. Aldaketek neurketaren erritmoa moteldu zuten, baina Real Union eroso zegoen zelaian, jokalari bat gehiagorekin eta baloiaren jabetzarekin. Partida kontrolpean zuten Fran Justoren mutilek. Zoramena 92. minutuan iritsi zen Galeko harmailetara. Norgehiagoka bukatzear zela, Cordobak irundarren laugarren gola lortu zuen. Txuri-beltzak jaun eta jabe izan ziren (4-0), eta hiru puntuak etxean geratu ziren.
Atzoko garaipenak aste gogor honi aurre egiten lagunduko die jokalariei, Real Unionek bi partida jokatuko baititu aste honetan. Lehenik eta behin, asteazkenean, irundarrek Federazio Kopako autonomia erkidegoko faseko finala jokatuko dute Galen Derioren aurka, 19:30ean. Asteko bigarren erronka larunbatean izango dute txuri-beltzek. Ligako laugarren jardunaldiko partida jokatuko dute Galizian Arenteiroren aurka, 19:30ean.
