Donostiako Klasikoak Irun gurutzatuko du larunbatean
Txirrindularien etorreraren harira, zirkulazioari eragiten dioten neurriak helarazi ditu udalak. Aurten Erlaitz igo eta lehen aldiz Irungo hirigunea gurutzatuko du lasterketak.
Larunbat honetan, hilak 29, Donostiako Klasikoa txirrindulari lasterketa lehiatuko da, eta aurten ere Irunera iritsiko da pelotoia. Aurtengo ekitaldian Erlaitz igo eta lehen aldiz Irungo hirigunea gurutzatuko dute txirrindulariek, eta lasterketaren etorreraren harira, zirkulazioari buruzko hainbat ohar helarazi ditu Irungo Udalak.
Aurreikuspenen arabera, txirrindulariak 14:37an sartuko dira Irunera, baina lasterketako autoa ordu erdi lehenago pasako dela jakinarazi du udalak. Hori dela eta, 13:55etik 14:45era bitartean, Hondarribia, Zubiaurre, Geltoki, Colon, Iparralde, GI-636 Azken Porturaino, Artiga eta Meaka kaleak moztuko dira.
Murrizketa horiek irauten duten denboran, ibilgailuak ezingo dira sartu edo atera Mendibil, Miguel de Astigar eta Jacobo Arbelaiz inguruetan. Irunbuseko autobusek ere atzerapenak izango dituztela iragarri du udal erakundeak, eta ez dira ohiko orduetan pasako geltokietatik.
Bestalde, Colon hiribideko eta San Juan plazako aparkalekuetara sartzeko aukera egongo da. Mendibileko aparkalekuaren sarrera, aldiz, guztiz moztuko da.
Aparkalekuei dagokionez, ostiral honetatik aurrera, ezingo da aparkatu Hondarribia kalean, Colon hiribidean eta Iparralde hiribidean (Ertzaintzako biribilgunearen eta Colon hiribidearen arteko zatian).
Lasterketa pasata eta oinezkoen segurtasuna bermatuta, murrizketak kenduko direla aurreratu du udalak. Gutxi gorabehera 16:45ean kenduko dituzte murrizketak.
