54 itzuli eman zituen Ilargi Emazabelek
Kutxa jaia ospatu zen, atzo, Hondarribian. Ilargi Emazabelek pozarren eraman zuen Kutxa buru gainean.
-
- Argazkia: Ane Markos
-
- Argazkia: Ane Markos
Egun osoan zehar izandako euri jasek herritarrak urduri mantendu zituen azken uneraino. Azkenean, baina, euriak erruki izan zuen.
Arratsaldeko 18:00etan puntu puntuan irten zen Ilargi Emazabel Arrantzaleen Hermandadetik, ertzetik ertzerako irribarre handi batekin. San Pedro kalea jendez lepo zegoen eta txalo zaparrada artean agurtu zuten denek. Emazabelek 20 kiloko kutxa zeraman buruan, Arrantzaleen Kofradiako paperak dituena.
Hermandadetik Sagarrondoko eta Jasokundeko Andre Maria Elizara abiatu ziren. Emazabel eta atzetik segitzen zuten guztiek. Bertan, meza labur bat egin eta Kofradiako paperak sinatu zituzten. Parrokiatik irten, eta alderantzizko bidea egin zuen.
Bidean zehar gertutik jarraitu zuten Igor Enparanek, Hondarribiko Alkateak, Eider Mendozak, Gipuzkoako Ahaldun Nagusiak, Arantxa Tapiak, Ekonomiaren Garapen, Jasangarritasun eta Ingurumeneko sailburuak eta Norberto Emazabelek, Arrantzaleen Kofradiako presidenteak.
Hondarribia Hiria Musika Bandaren laguntzarekin 54 itzuli eman zituen Emazabelek, omenaldi gisan. Hain zuzen, haren osabak aurten beteko zituen urteak irudikatu nahi izan zituen.
