Real Unionek Galen hasiko du liga Sabadellen aurka
Txuri-beltzek abuztuaren 27ko asteburuan hasiko dute aurtengo liga, etxean. Irundarrak denboraldi aurrearekin aurrera doaz, eta larunbatean jokatuko dute lehen lagunartekoa, Eibarren aurka, Zarautzen.
Argazkia: Real Union. Real Unionek iragan astean hasi zuen 2023-2024 sasoiko denboraldi aurrea Galen. Fran Justoren jokalariak denboraldi berria prestatzen ari dira ordutik, eta larunbat honetan jokatuko dute denboraldi aurreko lehen lagunarteko partida. Bigarren Mailako Eibar izango da arerioa, eta Zarauzko Asti zelaian jokatuko dute, 11:30ean.
Bien bitartean, Lehen Federazioko denboraldiaren egutegia zozkatu zen atzo Espainiako Futbol Federazioak Las Rozasen (Madril) duen egoitzan. Real Unionek etxean hasiko du sasoia abuztuaren 27ko asteburuan, Sabadellen aurka. Ligako azken partida, aldiz, 2024ko maiatzaren 26ko asteburuan jokatuko dute txuri-beltzek Coruñan, Deportivoren kontra.
Aurtengo sasoia prestatzeko denboraldi aurrea aurrera doa, eta Real Unionek beste hiru fitxaketa iragarri ditu aste honetan: Asier Benito, Ander Vidorreta eta Roger Riera. Benito aurrelaria da, eta Greziako Asteras Tripoli taldetik dator Irunera urtebeteko kontratua sinatuta. Vidorreta erdilaria da, eta Calahorratik fitxatu du talde txuri-beltzak. Bi urteko kontratua sinatu du. Azkenik, Riera atzelaria da, eta Herculesetik egin du Galerako bidea. Urtebeteko kontratua sinatu du Real Unionekin.
Harrobia
Mariño eta Real Unionek emakumeen futbola indartuko duen proiektua aurkeztu zuten martxoan. Bi taldeek indarrak batu dituzte emakumeei proiektu sendo eta indartsu bat eskaintzeko, eta proiektu hori urratsak ematen hasi da. Astelehenean Mariñok eta Real Unionek sustatzen duten emakumeen campusa hasi zen Galen, hilaren 28ra arte luzatuko dena. 2007 eta 2014 urteen artean jaiotako neskei dago zuzenduta udako campusa.
Bestalde, Real Unionek jakinarazi du datorren denboraldiko futbol eskolan parte hartzeko izen-ematea irekia dagoela. 2012 eta 2015 urteen artean jaiotako haurrei dago zuzendua, biak barne. Eskolaren inguruko informazio guztia, esteka honetan.
