Dies Oiassonisen jende edukiera beti ia beteta
Antzerkiaren ikusle kopurua %30 hazi da iazko datuekin alderatuta. Oro har, erantzun handia izan dute Oiasso ezagutzeko jarduerek.
XIII. Dies Oiassonis bukatu da eta Irungo Udalak baloratu du asteburu “bizia” izan dela iragandakoa. Guztira, 50 jarduera egin ziren, eta balorazio nabarmenena antzerkiari emandako erantzuna izan da: %30 ikusle gehiago.
Hainbat datu biltze aldera, zirku erromatarra ikusteko hiru emanaldietako sarrera guztiak saldu ziren; Erromatar afarirako 160 txartel saldu ziren, eta Asterix eta Obelix pelikula ikustera 400 pertsona gerturatu ziren. Bestetik, San Juan plazan ere Txingudi Errugbi taldearen eskutik joko ikuskizuna eskaini zen eta 350 lagun elkartu ziren.
Gastronomiak ere izan du txoko bat eta sukaldarien ponentziak azaltzeko jardunaldietan 60 eta 80 pertsonen artean bertaratu ziren. Pintxoaren ibilbidean 20 establezimenduk hartu zuten parte, eta lehen aldiz egin den arrain zopa lehiaketako garailea Getariako Txoko jatetxea izan zen.
Navigium Isidis desfilearen garaian euria egin zuen, baina udalak dio “jende asko” bildu zela ikustera. Miguel Angel Paez Hiri bultzadako ordezkariak azpimarra jarri du pertsona askoren lanean, “ahalegin handia eskaintzen baitute jaialdia haz dadin”.
Antzerki klasikoaz gozatzeko aukera ere egon da. Lan nagusietako bat Medea obra izan zen eta 160 ikusle joan ziren Amaia KZra. Beste emanaldiak Junkal plazatxoan izan ziren, eta bakarrizketara 50 pertsona joan ziren eta Troia antzerkira 160. Azken saio hauek doakoak izan ziren.
Guztira 800 pertsonaren bueltan gerturatu ziren antzerkiaz gozatzera, iaz baino %30 gehiago da hori. “Birsorkuntza historikoak eta antzerki ikuskizunak dibulgazio historiko erakargarri eta zirraragarriak dira, jendeari aukera ematen diote modu dinamiko eta bizian erromatarren iragana hobeto ulertu eta gozatzeko”.
