Real Union ostiralean jarriko da martxan
Talde txuri-beltzak ostiralean hasiko du denboraldi aurrea Galen, zaleei ateak irekita, 10:00etan. Aurrez, bihar, Fran Justo prestatzaile berria aurkeztuko dute. Horrez gain, hilaren 21ean, Euskal Herria Txapelaren finala jokatuko dute Realak eta Osasunak Galen.
Argazkia: Real Union. Iragan astean denboraldi aurreko lagunarteko partidak, fitxaketak, bajak eta kontratu luzapenak iragarri ondoren, Real Unionek jakinarazi du ostiral honetan, hilak 14, jarriko direla martxan Galen 2023-2024 sasoiko denboraldi aurreko lehen entrenamenduarekin. Lehen saio hori 10:00etan hasiko da, ate irekiekin, eta zaleek zuzenean ikusi ahal izango dute txuri-beltzen lehen entrenamendua.
Astea mugimenduz betea dator Galera, izan ere, bihar (asteazkena, hilak 12), 12:00etan, Real Unionek Fran Justo entrenatzaile berria aurkeztuko du Galeko prentsa aretoan. Bigarren Mailako Lugo da prestatzaile galiziarrak entrenatu zuen azken taldea, eta urtebeteko kontratua sinatu du txuri-beltzekin.
Justo aurkeztu aurretik, 09:30ean, jokalariek azterketa medikuak egingo dituzte Quironsalud Donostian eta indar testak FYLABen. Azterketa horiek pasata, berdegunera itzultzeko prest egongo dira Real Unioneko jokalariak.
Asteko bigarren entrenamendua larunbatean izango da Galen, hori ere ateak irekita, 10:00etan. Igandean, aldiz, atsedena izango dute jokalariek.
Bi fitxaketa gehiago
Iragan astean Asier Cordobaren eta Joseca Marquezen fitxaketak iragarri ondoren, Real Unionek beste bi fitxaketa egin dituela jakinarazi du: Victor Eimil eskuin hegaleko atzelaria eta Anton Escobar aurrelaria, biak urtebeteko kontratua sinatuta. Eimil Espainiako Bigarren Federazioko Hercules taldetik dator, eta iaz 24 partida jokatu zituen, gol bat sartuta. Escobar, berriz, Bigarren Federazioko Arenteirotik fitxatu du talde txuri-beltzak. Iazko sasoian 39 partida jokatu zituen, 16 gol sartuta.
Euskal Herria Txapela, Galen
Hilaren 21ean Euskal Herria Txapelaren VII. ekitaldiko finala jokatuko da Galen Realaren eta Osasunaren artean, 20:45ean. Sarrerak salgai daude esteka honetan.
