Ametsa, ia-ia egi
Gipuzkoako Zesta Puntako Kluben Arteko Txapelketako finalean, banakako modalitatean, hondarribiarrek ezin izan dute Danok Bat taldea gainditu.
Belauniko daudenak dira Hondarribiko pilotariak. Zesta Puntako Ezker Hormako Kluben Arteko Gipuzkoako Txapelketan, banakakoen modalitatean, Hondarribia herrialdeko txapeldunorde izan da. Igande arratsaldean jokatu zituzten Mutrikuko Miruaitz pilotalekuan finalaren barruko hiru partidak, etxeko klubaren kontra, Danok Bat. Hiru partidetatik bakarra irabazi ahal izan zuten hondarribiarrek. Kantxa faktorea kontra izanagatik ere, partida guztiak borrokatu zituzten.
Lehenean, Kadete Mailakoan, Manex Zamorak amore eman behar izan zuen Mutrikuko Ekhi Leteren kontra, 25-20 galdu zuelako. Bigarrenean, Gazte Mailakoena, Markel Amborage ere 20an gelditu zen Unax Zubizarretaren aurrean. Nagusien Mailakoa izan zen hondarribiarren garaipen bakarra, Julen Basterrak 25-19 gainditu zuelako Mikel Manzisidor mutrikuarra.
Finala galduta ere, harro egoteko bidea egin du Hondarribiko taldeak.
