[Argazki galeria] Suaren eta dantzaren kuraiekin hasi dira jaiak
Kemen dantza taldeak 50 urte bete ditu eta soka dantza berezia zuten atzokoa. Txupina, El Pilar eta San Vicente ikastetxeko irakasle eta haurrek bota zuten.
Hasi dira Irungo San Pedro eta San Martzial jaiak. Horren adierazle da San Juan plazan urtero alkateak pizten duen sua, eta aurretik Kemen Dantza Taldeko kideek dantzatu ohi duten soka dantza.
Aurten, gainera, dantza berezia izan da dantzarientzat, taldea 50. urteurrenean baitago. Soka dantza dantzatu eta gero, Kemenen parte izandako kideei gonbita luzatu eta denen artean egin zuten dantza. Hunkidura zen nagusi eta bukaerako irrintziak, poza eta ilusioaren seinale izan ziren.
Dantzaldia ondoren, txupina bota zuten El Pilar eta San Vicente de Paul ikastetxeek. Udalak adierazi zuen bi ikastetxeek 100 urte bete dituztelako izan dutela udaletxeko balkoitik hitza hartzeko aukera, “hezkuntza edozein gizarteren oinarrizko oinarria” dela aldarrikatu zuten haurrek.
