XXXIII. Irun Hiria Sari Nagusia lehiatuko da bihar Jaitzubian
Sanpedro eta sanmartzial jaien egitarauaren barruan egingo da hipika jauzien lehiaketa mitikoa. 10:00etan hasiko da txapelketa.
Sanpedro eta sanmartzial jaien egitarauaren barruan, Jaizubia Zaldiketa Eskolak antolatzen duen XXXIII. Irun Hiria Sari Nagusia ‘Nagore Otañoren Oroimenezkoa’ jauzien lehiaketa egingo da bihar, hilak 17, Jaitzubian.
Probak Jaizubia Zaldiketa Eskolaren pista nagusian egingo direla aurreratu du hipika klubak. Txapelketa 10:00etan hasiko da Jaitzubian, eta hainbat altueratako jauziak egingo dituzte: 0,50 metrotik 1,30 metrora bitartekoak. Horrez gain, parte hartzaileen etorrera errazteko, ibilgailuentzako aparkalekuak jarriko dituzte Txingudi Ikastolan, ikastetxe parean eta Urdanibia jauregiaren inguruan.
