Goi mailako esku pilota jaialdia Irunen
Bi partida jokatuko dira uztailaren 1ean Uranzun, 18:00etatik aurrera. Buruz buruko txapelketako finalistetako bat (Altuna III. edo Elordi) eta binakako txapelketako atzelari irabazlea (Zabaleta) Irunen izango dira.
Goi mailako esku pilota profesionaleko jaialdia lurreratuko da sanpedro eta sanmartzial jaietan Irunen. Gaur goizean aurkeztu dute jaialdia Uranzu pilotalekuan Borja Olazabal Irungo Udaleko Kiroletako jarduneko ordezkariak eta jaialdia antolatzen duen ASPE enpresako Inaxio Errandonea ordezkariak. Pilota partidak uztailaren 1ean izango dira, larunbata, 18:00etatik aurrera, Uranzu pilotalekuan.
Orotara, bi partida profesional jokatuko dira. Lehenbizikoa promozioko binakako neurketa bat izango da, eta Dario-Eskuza eta Salaberria-Bikuña bikoteak arituko dira nor baino nor. Partida nagusia, aldiz, maila handikoa izango da, sasoi onean dauden pilotari batzuk izango baitira Uranzun, aurtengo binakako eta buruz buruko txapelketetan finalaurreko eta finaletara iritsitakoak.
Zehazki, Altuna III. edo Elordi, Rezustarekin batera arituko dira. Bigarren bikotea, berriz, Ezkurdiak edo Etxeberriak osatuko dute Zabaletarekin batera. Elordi txapeldun izan da aurtengo binakako eta buruz buruko txapelketan; Zabaleta txapeldun izendatu zen Elordirekin binakakoan; eta Altuna III.a txapeldunorde izan da buruz burukoan.
“Lehen mailako kartela osatzen saiatu gara; hainbesteraino, non bukatu berri den buruz buruko txapelketako finalistetako bat izango baitugu gutxienez Uranzun, baita denboraldi honetako binakako txapelketa irabazi zuen atzelaria ere”, esan du harro Olazabalek uztailaren 1erako antolatu duten jaialdiaz.
Sarrerak
Esku pilotako jaialdiko sarrerak eskuragarri daude jada Entradasfronton webgunean, 25 euroan erreboterako eta goialderako eta 30 euroan kantxarako. Uranzuko txarteldegian ere eskura daitezke sarrerak partiden egunean bertan, 17:00etatik aurrera, betiere sarrerarik geratzen bada.
