Ekoetxea Txingudik hirugarrenez antolatu ditu udalekuak
Udalekuak 7 eta 12 urte bitarteko haurrei zuzenduta daude. Uztailean eta abuztuan izango dira, goizez, 10:00etatik 13:30era. Izen-emateak irekita daude.
Hirugarren urtez jarraian, Ekoetxea Txingudik udalekuak antolatu ditu 7 eta 12 urte bitarteko haurrentzako. Uztaila eta abuztuan zehar izango dira udalekuak, eta antolatzaileek gai zehatzak planteatu dituzte udaleku osorako lotura gisa. Plaiaundiko esploratzaileak, babesleak eta ekintzaileak izatea dira proposatu dituzten hiru gaiak, eta antolatzaileek zehaztu dute partaideek “ingurune naturala deskubritu eta gozatuko” dutela.
Udalekuetan parte hartzen dutenek parkean dagoen guztia (flora, hegaztiak, aintzirak…) ezagutuko duten esperientziak biziko dituztela eta ingurumenaren ikuspuntutik adierazgarrienak diren eremuak identifikatuko dituztela adierazi du Ekoetxea Txingudik. Udalekuen ildo nagusia “ingurune natural garrantzitsu horren balio ekologikoak ezagutzea, babestea eta kontzientziazio eta sentsibilizazio ekintzen bidez ikustea” izango dela jakinarazi dute antolatzaileek.
Gai bakoitzak astebeteko iraupena izango du, eta udalekuak astelehenetik ostiralera izango dira, goizez, 10:00etatik 13:30era. Jaiegunetan saiorik egingo ez dela aurreratu dute. Prezioari dagokionez, doako udalekuak dira, baina parte hartzeko beharrezkoa da Ekoetxearen atarian izena ematea.
Orotara, zazpi txanda egingo dira, hiru uztailean eta lau abuztuan. Lehenengo eguna uztailaren 4a, asteartea, izango da, eta azkena, irailaren 1a, ostirala. Txanda bakoitzean gehienez hamar haurrek parte har dezaketela nabarmendu dute, eta taldeak hezitzaile bat izango du. Hona hemen txanden egutegia:
- 1. txanda: Uztailaren 4tik, asteartea, uztailaren 7ra, ostirala, 10:00etatik 13:30era.
- 2. txanda: Uztailaren 10etik, astelehena, uztailaren 14ra, ostirala, 10:00etatik 13:30era.
- 3. txanda: Uztailaren 17tik, astelehena, uztailaren 21era, ostirala, 10:00etatik 13:30era.
- 4. txanda: Abuztuaren 1etik, asteartea, abuztuaren 4ra, ostirala, 10:00etatik 13:30era.
- 5. txanda: Abuztuaren 7tik, astelehena, abuztuaren 11ra, ostirala, 10:00etatik 13:30era.
- 6. txanda: Abuztuaren 21etik, astelehena, abuztuaren 25era, ostirala, 10:00etatik 13:30era.
- 7. txanda: Abuztuaren 28tik, astelehena, irailaren 1era, ostirala, 10:00etatik 13:30era.
Uztaileko azken astean eta abuztuaren 15eko astean ez da udalekurik egongo.
