Irungo Harrera Sareak elkarretaratzera deitu du, iganderako
Herenegun Espainiako Poliziaren komisarian agertu zen agiria dela-eta, 12:00etan elkartuko dira, Zabaltza plazan.
Argazkia: Gari Garaialde. Herenegun, asteazkenean, Espainiako Poliziaren Irungo komisarian agertutako agiri batek zeresana eman zuen: aparteko jaiegunak eskaintzen zizkien agenteei, asteburutan atxilotuko zituzten migratzaile kopuruaren arabera. Inor ez atxilotzekotan, bi jaiegun eskainiko zizkieten; inor atxilotzekotan, hiru; bi atxilotutik aurrera, lau; eta hamar lagun atxilotzetik aurrera, bost jaiegun. Agindua inspektoreordeak eman zuen, eta EAEko buruzagitzak espedientea ireki dio.
Irungo Harrera Sareak (IHSk) kezkaz eta arduraz jaso zuen albistea, eta aginduak “migratzaileak ehizatzea” beste xederik ez duela adierazi. Hortaz gain, IHSk Espainiako Poliziari “gertatutakoa argitu “eta “aurkeztu behar diren dimisioak aurkezteko” eskatu zion. Gainera, “giza eskubideak errespetatzeko eta arrazismoaren aurka borrokatzeko” prestatzeko eskatu zion ere. Hilero 100 bat migratzaile atxilotzen ditu Espainiako poliziak Irunen.
Hau horrela, igandean, etzi, elkarretaratzea antolatu du IHSk. Eguerdiko 12:00etan elkartuko dira Zabaltza plazan, komisari aurrean, “Polizia jauna, nik zenbat balio dut?” lemapean.
