Espainiako Poliziak jaiegunak eskaini ditu Irunen atxilotutako migratzaile kopuruaren arabera
Agindua baliogabetu dute. Agiriak jasotzen duenez, etorkin bat atxilo hartzearen truke hiru jai egun lortuko zituzten; bi atxilo hartuta, lau egun; eta hamarrekin, bost.
Harrabotsa sortu du Irungo komisaldegian agertu den agiri batek. Irungo Atzerritarren eta Mugen Brigadako buruak sinatutako ohar bat da, eta, bertan, jaiegunak eskaintzen dira atxilotutako migratzaile kopuruaren arabera. Herenegun, astelehena, egon zen agiria publiko, eta agindua bertan behera utzi zuen ondoren poliziaren EAEko buruzagitza nagusiak.
Oharrean jasotzen zenez, uztailaren 1etik aurrera Espainiako Poliziak «konpentsazio egunak» emango zizkien agenteei asteburuan atxilotutako migratzaile kopuruaren arabera. Atxiloketarik gabe, bi jai egun izango zituzten; atxilotu batekin, hiru egun; bi atxilotzeekin, lau egun; eta hamar atxilotzetik gora, bost egun.
Jupol Espainiako Poliziaren sindikatu nagusiak agindua salatu du sare sozialetan. Intzidentzien modalitateko zerbitzua behar bezala araututa dagoela esan du, eta Irunen jazotakoa kritikatu: «Badirudi bultzatzen ari direla atzerritartasunagatik atxilotutakoen kopurua handitzea».
https://twitter.com/Jupol_Guipuzcoa/status/1666077154495307776
