Herriko gazteak teknologia berrietara hurbilduko dira
Udalak eta Bidasoa Bizirik-ek prest dute GazteTEK tailer teknologikoen aurtengo edizioa. Udako eskola oporretan bi tailer emango dizkiete, adinaren araberako bi txandatan.
Hondarribiko Udalak eta Bidasoa Bizirik-ek prest dute GazteTEK tailer teknologikoen aurtengo edizioa. Tailerrak udako eskola oporretan egingo dituzte, bi txandatan banatuko dituzte partaideak, adinaren arabera (8,9 eta 10 urtekoak talde batean eta 11, 12 eta 13koak bestean). ‘Erronka robotikoa-Espazioko desafioa’ eta ‘Ilargi-baseko space erronka’ tailerrak egingo dituzte. Tailer guztiak Kultur Etxean egingo dituzte, goizez (9:30etik 13:30era).
Antolatzaileen arabera, «sormenezko ekintzailetza sustatzea» dute helburu ikastaroek, finean, gazteen artean espiritu ekintzailea piztu eta hauek teknologia berrietara hurbildu nahi dituzte. Jarduera guztiak praktikoak izango dira, eta erabiliko dituzten tresnak «erabilerrazak eta intuitiboak» izango dira.
Igandea izango da izena emateko azken eguna. atari honetan egin beharko dira. Gehienez 10 lagun onartuko dituzte tailer bakoitzeko. Gehiago badira, zozketa egingo dute.
