Burdina izango dute hizpide EHUko udako ikastaroetan
Burdina ardatz izango duten jardunaldiak lurreratuko dira udan Irunen, 'Ezpatak baino gehiago: burdina Erromatar Inperioan' izenburupean. Abuztuaren 31n eta irailaren 1ean izango dira, Gordailuan eta Oiasso Museoan.
Irungo Udalak eta Gipuzkoako Foru Aldundiak antolatuta, Euskal Herriko Unibertsitateko (EHU) udako ikastaro bat Irunen lurreratuko da. ‘Ezpatak baino gehiago: burdina Erromatar Inperioan’ du izena ikastaroak, eta burdinak Erromatar Inperioaren garaian jokatutako papera aztertuko dute. Jardunaldiak abuztuaren 31n eta irailaren 1ean izango dira, bi kokalekutan: Gordailuan eta Oiasso Museoan.
Antolatzaileek adierazi dute ikastaroaren xedea dela burdinak “eragin handieneko alorretan” izandako ekarpenak aurkeztea; hala nola, merkataritzan, ekoizpen metodoetan, paisaian edo egitura ekonomikoetan. Hori dela eta, ikastaroa emango duten irakasleak Antzinako meatzaritzako eta metalurgiako aditu “garrantzitsuak” direla nabarmendu dute.
Jardunaldiak herritar orori zuzenduta daudela jakinarazi du udalak. Horrez gain, izena emateko eta programari buruzko xehetasunen berri emateko, EHUko udako ikastaroen webgunea ahalbidetu dute.
Ostegunean, Javier Gil idazlearen hitzaldia
Ostegunean (hilak 25) ‘Kontaiguzu dakizuna’ zikloaren beste hitzaldi bat eskainiko dute, 19:00etan, Oiasso Museoan. Saioko protagonista Javier Gil Diez-Conde euskal idazlea izango da, eta ‘Una guerra olvidada y otra inventada’ izenburupean, bere azken eleberriari (La imagen heroica) buruzko hitzaldia emango du.
La imagen heroica liburua idazteko, Gil bere familiaren historian murgildu dela zehaztu dute antolatzaileek. Eleberri horretan Rifeko gerran hildako aitonaren istorioa kontatzen du idazleak, Euskal herrian ‘berunezko urteetan’ bizi den biloba baten ikuspuntutik.
