Javier Sagarzazu artista hondarribiarra omentzeko, erakusketa
Olio eta akuarela ugari bilduko dituzte Arma Plazako kultur eta turismo informazio gunean. Bihar inauguratuko dute.
Javier Sagarzazu artista hondarribiarra omentzeko erakusketa antolatu du Arma Plaza fundazioak. Margolari ospetsuak azken sei hamarkada hauetan egin dituen sorkuntzen errepasoa egingo dute erakusketarekin. Olio eta akuarela ugari bilduko dituzte Arma Plazako kultur eta turismo informazio gunean.
Bihar (hilak 10) inauguratuko dute, eta 28ra bitarte bisitatzeko aukera izango da, astelehenetik larunbatera 10:00etatik 19:00etara eta igandeetan 10:00etatik 14:00etara. Gainera, hilaren 14an eta 21ean, 11:30ean, artistak berak bisita gidatua egingo du bisitariekin, “esperientzia paregabea eskaintzeko eta egilearen iruzkinak eta bizipenak ikusgai jartzeko”.
Omenaldia biribiltzeko Paisaia eta oroitzapen zatiez osatutako atlasa liburua ere argitaratu dute, Fernando Galvano arte adituaren eskutik.
