Oiasso Museoak antzerkizaletasuna sustatzen jarraitzen du
Museoak egitarau oparoa osatu du udaberrirako helduen eta haurren artean antzerkia eta antzerkizaletasuna bultzatzeko helburuarekin.
Irungo Udaleko Kultura arloak jakinarazi du Oiasso Museoak antzerki eta irakurketa dramatizatuko tailerrak jarri dituela martxan udaberrirako, helduen eta haurren artean antzerkia eta antzerkizaletasuna sustatzeko helburuarekin.
Oiassoren egitasmo horren xedea da herritarren artean antzerkiaren eta ikuskizun eszenikoen gaineko interesa piztea, Dies Oiassonik jaialdi erromatarraren programazioa ardatz hartuta.
Antzerki saioak esparru horretako profesionalek emango dituztela aurreratu dute, parte hartzaileen adinera egokituak. Ikastaro guztiak Oiasso Museoan gauzatuko dira, eta izen-emateak ere museoaren bitartez egin behar direla baietsi dute antolatzaileek. Izen-emate horiek 943 63 93 53 telefonora deituta edo posta elektroniko bidez egin behar dira.
Honako da Oiasso Museoaren udaberriko egitaraua:
Irakurketa dramatizatuko tailerra: Erregutzaileak (Euripides):
- Adina: 18 urte edo gehiago.
- Arduraduna: Ana Perez.
- Egunak: Maiatzak 2, 9 eta 17; ekainak 6, 13 eta 20; eta uztailak 4, 5 eta 11.
- Ordutegia: 18:30etik 20:30era.
- Prezioa: 40 euro.
- Interesdunak museoarekin harremanetan jar daitezke.
Haurrentzako antzerki tailerrak:
- Adina: 8-13 urte.
- Arduraduna: Nerea Arriola.
- Egunak: Apirilak 26 eta ekainak 21, asteazkenak.
- Ordutegia: 17:15etik 18:15era.
- Prezioa: 20 euro.
Gitarra jaialdia:
Datorren igandean, hilak 30, 12:00etan, Hondarribiko Gitarra Jaialdiaren esparruan, Francisco Ortiz bakarlariak kontzertu bat emango du Oiasso Museoan. Sarrera gonbidapen bidezkoa izango da, eta agortu arte. Hilaren 29an, larunbata, jaso ahal izango dira museoaren egoitzan, 10:00etatik aurrera.
