Eusko Ikaskuntzaren eskutik tailer bat, Irungo elkarteetako erreleboaz aritzeko
Irunen parte hartzeko bide berriak aztertuko dituzte, hiri honetako biztanleriaren %15 migratzailea eta gaztea dela aintzat hartuta. Maiatzaren 8, 15, 18 eta 25ean egingo da.
Eusko Ikaskuntzak, Plaiaundi institutuarekin elkarlanean, Gipuzkoako Foru Aldundiaren eta Irungo Udalaren laguntzarekin, Enredatu deituriko tailer ireki bat antolatu du maiatzaren 8, 15, 18 eta 25erako, institutuan bertan egingo dena.
Asmoa da bi orduko lau tailerren bidez, “kultura eta belaunaldien arteko topaguneak sustatzea”. Eusko Ikaskuntzak azaldu du Irunen parte hartzeko bide berriak aztertuko dituztela, hiri honetako biztanleriaren %15 migratzailea eta gaztea dela aintzat hartuta.
Partaidetza eta elkar ezagutza sustatzeko helburua izateaz gain, “elkarteetan erreleboa jorratuko da, migrante gazteek izan dezaketen papera mahai gainean jarriz”. Hartara, Irungo elkarteetako 25 urtetik gorako pertsonek, eta Irunen errotuta dauden edo ez dauden Espainiako eta Frantziako Estatuetako nahiz eta nazioarteko migratzaileek parte hartzea nahi dute.
Tailerren amaieran lortzea helburu dutena, “parte hartzaileek gaitasun berriak garatzea eta beren trebetasunaz jabetzea” dela adierazi dute, “talde migratzailearentzat elkarteek ematen duten laguntza izanik” gaineratu dute.
Bada, maiatzaren 8,15,18 eta 25ean egingo diren bi orduko lau tailerretara joateko izen ematea zabalik dago maiatzaren 3ra arte. Horretarako, mezu bat bidali behar da helbide elektroniko honetara.
