Aurora Bengoetxearen lanean sakontzeko, bi tailer didaktiko
Apirilaren 29ean eta maiatzaren 27ean egingo dira tailerrak. Erakusketa "sentitu eta jolastu" egingo dutela azaldu du tailerra eskainiko duen Itsaso Labarik.
Apirilaren 29an eta maiatzaren 27an tailer bana egingo da 5 urtetik goitiko haurrentzat orain Menchu Gal aretoan ikusgai dagoen Aurora Bengoetxearen lanak aitzaki, Aurora Bengoetxea berrikusten ariko dira hain zuzen. Bi hitzorduak 16:00etatik 18:00etara izango dira, doakoak dira eta parte hartzeko izena eman behar da udalaren orrialdeko atal honetan.
Erakusketa aretoan hogei eta hamar obra daude eta ez dira margolanak soilik, baita ere litografia eta collageak, eta ikus-entzunezko osagarri bat ere ikusteko aukera dago.
Itsaso Labari ondare kulturalen kontserbazioan aditua da eta berak eskainiko ditu tailerra, eta adituak azaldu duenez didaktikoak izango dira tailerrak: “Normalean, erakusketak ikusi bakarrik egin daitezke. Kasu honetan, ordea, ikusteaz gain, erakusketa sentitu ahalko da, eta jolaserako aitzakia bat izango da. Hain zuzen ere, horixe da tailer didaktikoen helburua”.
Bi atal izango dituzte saioek; batetik, erakusketan barrena joango dira ibilbide teoriko bat eginez, “irudimena piztuko da, paisaiei, figurei eta pinturaren dualtasunari buruz hausnartzeko”; segidan, erakusketa abiapuntutzat hartuta jolasten hasiko dira, “parte hartzaile bakoitzak bere pintura sortuko du, tenpera erabiliz, eta, haren bidez, bere koadroa”.
Bestetik, udalak gogoratu du erakusketa ostiral, larunbat eta igandeetan ikus daitekeela: ostiral eta larunbatetan, 18:00etatik 21:00etara bitartean eta, igande eta jaiegunetan, 11:30etik 13:30era bitartean.
