Komun publikoen sarea indartuko du Irungo Udalak
Egun dauden 14 instalazioak, 17 izango dira aurrerantzean. Nagore Laffage parkean komun berri bat ezarriko da, eta San Juan eta Zabaltza plazetan bi berri jarriko dituzte. Azken bi horiek Santiagora lekualdatuko dira.
Komun publikoetako kabinak alokatu, instalatu, zaindu, mantendu eta garbitzeko kontratu berriaren esparruan, Irungo Udalak jakinarazi du instalazio berriak jarriko direla hirian. Iniziatiba hori herritarren eskaeretatik datorrela adierazi du udalak, parte hartzeko prozesuetan eskatu baitzituzten. Egun, 14 komun publiko daude Irunen, eta jarriko dituzten berriekin, 17 izango dira aurrerantzean. Hona hemen egingo dituzten mugimenduak:
- Komun kabina berri bat jarriko da Palmera Monteron, Nagore Laffage parkean. Obrak hasi dituzte eta maiatzean erabilgarri egongo dela aurreikusten da.
- Egun San Juan eta Zabaltza plazetan dauden komunak aldatuko dituzte, bi berri jarrita. Komun berriak handiagoak izango dira, eta prestazio hobeak eskainiko dituzte, Palmera Monterokoak bezala. Bi komun berri horiek datozen asteetan prest egongo direla aurreikusten da.
- Mugimendu multzoa osatzeko, San Juan eta Zabaltza plazetan aldatutako bi instalazioak Santiagon jarriko dira, bidegorriaren hasieran.
Komun publikoek etenik gabe funtzionatzen dute 08:00etatik 22:00etara. Jenaro Etxeandian, aldiz, ez dituzte ixten; eta Zabaltzan, Anzaranen eta Pio XIIn 07:00etatik 24:00etara daude martxan.
Irungo Udalak 197.102,30 euro bideratu ditu komun publikoen kontraturako. Azken datuen arabera, 2021ean 302.593 erabilera erregistratu zituzten instalazioek.
